2020 jylǵa qaraı Qazaqstan arqyly 2 mln konteıner ótetin bolady
ASTANA. QazAqparat - Bıyl Qazaqstan aýmaǵy arqyly Qytaıdan Eýropaǵa baratyn tranzıttik júk tasymaly eki esege artady. Bul jaıly «Qazaqstan temir joly» UK» AQ logıstıka jónindegi vıtse-prezıdenti Sanjar Elýbaev málim etti, dep habarlaıdy QazAqparat tilshisi.
«2011 jyly Qazaqstan arqyly Eýropaǵa 1000 konteıner ótken bolsa, 2017 jyly bul kórsetkish 201 myńǵa jetti. 7 jylda 200 ese ósetin bıznesti kóz aldyńyzǵa elestetińizshi?! Bizdiń boljamymyzsha, Qytaı-Eýropa baǵytyndaǵy tranzıttik júk tasymaly bıyl eki ese artady», - deıdi Sanjar Elýbaev.
Ol, sondaı-aq mundaı qarqyndy ósimge qalaı qol jetkizilgenin de túsindirdi.
«Tranzıttiń qurylymynan, kórshi elder tek óz ekonomıkasynyń ósimi arqyly ǵana tranzıtti arttyryp otyrǵanyn kórýge bolady. Qytaıdan Eýropaǵa teńiz arqyly jylyna 20-30 mln konteıner júk barady. Demek, biz munda zor áleýetke ıemiz. «Nurly jol: Bir beldeý-bir jol» saıasatynyń arqasynda osyndaı nátıjege qol jetkizip otyrmyz. 2020 jylǵa qaraı Qazaqstan arqyly 2 mln konteıner ótedi dep boljap otyrmyz, biz oǵan daıynbyz», - dedi ol.
