2020 jylǵa qaraı elordaǵa keletin sheteldik týrıster sany mıllıonǵa jetedi
ASTANA. QazAqparat - 2020 jylǵa qaraı elordaǵa keletin sheteldik týrıster sany mıllıon adamǵa jetedi dep kútilýde. Bul týraly búgin Úkimettiń selektorlyq rejimdegi otyrysynda elorda ákimi Áset Isekeshev aıtty aıtty, dep habarlaıdy QazAqparat.
«Negizgi maqsat - 2020 jylǵa qaraı kórsetkishti 2 mln týrıstke, onyń ishinde 1 mıllıonyn sheteldik týrıstke jetkizý. Ótken jyly kelgen týrısterdiń jalpy sany 830 myńdy qurasa, onyń 270 myńy sheteldik boldy», - dedi ol.
Ákimniń aıtýynsha, qalanyń týrıstik áleýetin arttyrý maqsatynda arnaıy jol kartasy ázirlenip, onyń oqıǵa-iskerlik, rekreatsııalyq-qalalyq jáne medıtsınalyq týrızm syndy úsh baǵyty aıqyndalǵan.
«EKSPO-2017 kórmesin ótkizýdiń arqasynda qalanyń tanymaldyǵy artqanyn jáne shara aıasynda is-sharalardy synaqtan ótizýge múmkindik bolǵanyn atap ótken oryndy. Sporttyq, mádenı jáne ekonomıkalyq baǵyttardaǵy 300-den astam is-shara ótkizildi», - dedi Isekeshev.
Onyń dereginshe, qazirgi ýaqytta qalanyń týrıstik ınfraqurylymy jaqsy. Elordada 15 myń adam sııatyn 201 qonaq úı, 1100 dámhana men meıramhana, sondaı-aq qonaq kútýge qatysy bar ózge de nysnadar jumys istep tur.
«Jol kartasy aıasynda birqatar baıypty is-shara ótkizý josparlanǵan. QR Mádenıet jáne sport mınıstrligimen birge mádenı, sporttyq, halyqaralyq sıpattaǵy 470-ten astam, sonymen birge mınıstrliktermen jáne vedomstvolarmen halyqaralyq forýmdar men konferentsııalar ótkizýdi aıqyndaýdamyz. Atalǵan sharalardyń negizgi basymdyǵy - sheteldik jáne bizdiń óńirlerimizden týrısterdiń qatysýy», - dedi elorda basshysy.
Isekeshevtiń sózine qaraǵanda, munan bólek qalada týrısterge tartymdy bolatyn ǵarysh mýzeıi, botanıkalyq baq, jabyq akvapark, otbasylyq oıyn-saýyq ortalyqtary jáne sporttyq nysandar salý josparlanýda.
