2020 jylǵa qaraı azyqtyq daqyldar alqaby 10,2 mln. gektarǵa jetedi - QR AShM
Bul týraly búgin mal azyǵyn óndirý máselesine arnalǵan keńeıtilgen alqa otyrysynda QR Aýyl sharýashylyǵy vıtse-mınıstri Gúlmıra Isaeva málim etti.
«Qazirgi tańda azyqtyq daqyldar alqaby 3,1 mln. gektardy quraıdy. 2020 jylǵa qaraı ıesiz qalǵan jáne tyńaıǵan jerlerdi ıgerý arqyly azyqtyq daqyldar alqabyn 10,2 mln. gektarǵa jetkizý josparlanýda», - dedi ol.
Vıtse-mınıstrdiń alǵa tartqan derekterine qaraǵanda, sońǵy 5 jyldyń ishinde azyqtyq daqyldar alqaby 747 myń gektarǵa nemese 32 paıyzǵa ulǵaıǵan. Degenmen 90 jyldardyń basyndaǵy kórsetkishterge jetpeıdi. Máselen, 1991 jylmen salystyrǵanda elimizdegi azyqtyq daqyldar alqaby eselep tómendegen.
QR Aýyl sharýashylyǵy mınıstri Asyljan Mamytbekov orynbasarynyń mundaı derekterine syn aıtty. «Biz 91 jyldary 7 ese kóp pishen nemese birneshe ese súrlengen shóp daıyndadyq degenimizben, bul eshteńeni de bildirmeıdi. Múmkin dál qazirgi ýaqytta munshalyqty mol pishen men súrlengen shóp qajet emes te shyǵar. Qazir bizde múldem basqa qurylym. Maldyń 80 paıyzy jeke sharýa qojalyqtarynyń qolynda. Olar mal azyǵyn úıip tastasań da, sol pishen men súrlengen shópti almaıdy. Bizdiń aldymyzda 91 jylǵy kórsetkishti basyp ozý mindeti turǵan joq», - dedi A.Mamytbekov.