2020 jylǵa qaraı aqyly joldardan 33 mlrd. teńge kiris túsedi
ASTANA. QazAqparat - 2020 jylǵa qaraı aqyly joldardan 33 mlrd. teńge kiris túsedi. Bul týraly Úkimet otyrysynan keıingi brıfıngte QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Búginde kóptegen avtomobıl joldary jańǵyrtylyp, salynyp jatyr. Sondyqtan joldardy sapaly kútip ustaý jáne joldardaǵy qaýipsizdikti qamtamasyz etý máselesi ózekti bolyp qala bermek. Memlekettik bıýdjetke júktelimdi tómendetý ári joldardy kútip ustaý ózin-ózi óteýin qamtamasyz etý maqsatynda Astanadan Şýchege deıingi aqyly jol úlgisinde jańǵyrtýdan ótken barlyq avtomobıl joldaryn aqyly júıege kezeń-kezeńimen engizý josparlanýda. Mundaı shara 2020 jylǵa qaraı aqyly joldardan alynatyn alym kólemin 33 mlrd. teńgege deıin arttyrýǵa múmkindik beredi», - dedi mınıstr.
Onyń aıtýynsha, 2022 jylǵa qaraı Qazaqstandaǵy aqyly joldardyń uzyndyǵy 7 myń shaqyrymǵa deıin jetetin bolady. Osy rette ol elimizdegi eń birinshi aqyly bolǵan Astana-Şýche avtjolynyń ortasha jyldyq qarqyndylyǵy táýligine 8 myń kólikti quraıtyndyǵyn atap ótti. Bul rette túsken qarjynyń 30 paıyzy jeńil kólikten alynady. Al qalǵany júk kólikterine tıesili.
«Qoldanystaǵy tarıf sheteldermen, onyń ishinde kórshiles Reseı men Qytaımen salystyrǵanda birshama tómen. Bul elderde jeńil kólikter úshin sáıkesinshe 5 jáne 15 teńgeni quraıdy. Júk kólikteri úshin tarıf shaqyrymyna ortasha eseppen 50 teńge. Aǵymdaǵy jyly 1,2 mlrd. teńge jınalady dep josparlanýda. Bul atalǵan joldy kútip ustaýǵa ketetin shyǵyndardy jabýǵa tolyq jetedi», - dedi Qasymbek.
