2020 jylǵa deıin joǵary jyldamdyqty ınternetke 1,5 myń aýyl mektebi qosylady

ASTANA. QazAqparat - 2020 jylǵa deıin Qazaqstanda keń jolaqty ınternetpen bir jarym myńnan astam mektep qamtamasyz etiledi. Bul týraly QR Investıtsııalar jáne damý mınıstrligi Baılanys, aqparattandyrý jáne aqparat komıteti tóraǵasynyń orynbasary Dmıtrıı Golobýrda málim etti.

Onyń aıtýyna qaraǵanda, búginde elimizde 5,5 myńǵa jýyq aýyl mektepteri bar, onyń ishinde eki myńy «elektrondy oqytý» baǵdarlamasy aıasynda joǵary jyldamdyqty ınternetpen qamtamasyz etildi. Osy oraıda ol aýyldyq jerlerdi sapaly keń jolaqty ınternet qyzmetimen qamtamasyz etý úshin 2016 jyldan bastap eldi mekenderde baılanystyń talshyqty-optıkalyq jelileri qurylysyn júrgizý josparlanyp otyrǵanyn eske salyp ótti. «Usynylyp otyrǵan joba aıasynda qosymsha 1580 mektepti qosý qamtamasyz etilmek. Bul mektepterde 500 myńǵa jýyq oqýshy qamtylǵan»,- dedi ol. D.Golobýrdanyń aıtýynsha, ınternettiń keń jolaqty jelisi 1 900 mektepke jetpeıdi, olardyń basym bóligi shaǵyn mektepter jáne osy mektepterde 110 myńǵa tarta oqýshy qamtylyp otyr. Bul óz kezeginde elimiz boıynsha oqýshylardyń 4 paıyzyn quraıdy. «Alaıda olar nazardan tys qalmaıdy. Osyndaı mektepter úshin basqa tehnologııalar qosylady, ıaǵnı onda aıtarlyqtaı joǵary jyldamdyqty ınternet qamtamasyz etiletin bolady», - dedi ol.