2020 jylǵa deıin JІÓ ósimin 7 paıyzdyq deńgeıde qamtamasyz etý úshin 80 mlrd. dollar ınvestıtsııa qajet

Bul týraly búgin «Báıterek» UBH» AQ «Qazaqstan Respýblıkasy ındýstrııalandyrý baǵdarlamasyn qarjylandyrý jobasyn jetildirý» jónindegi basqarýshy komıtetiniń ekinshi otyrysynyń qorytyndysy boıynsha BAQ ókilderine suhbat bergen atalǵan holdıngtiń basqarma tóraǵasy Qýandyq Bıshimbaev málim etti.

«Bizdiń josparymyz ben Prezıdent tapsyrmasyna sáıkes ındýstrııalandyrýdyń 2-shi besjyldyǵynyń qarjylyq josparyn daıyndap otyrmyz. Bizdiń jumysymyzdyń nátıjelerine oraı 2020 jylǵa deıin ekonomıkaǵa qosymsha 80 mlrd. dollarǵa jýyq ınvestıtsııa kólemin tartý kerek bolady», - dedi ol.

Q. Bıshimbaevtyń atap ótýinshe, búgingi otyrysta osynshama kólemdegi ınvestıtsııany qaıdan jáne qalaı tartý kerek degen másele keńinen talqyǵa túsken. Onyń paıymynsha, mundaı nátıjege qol jetkizý úshin qarjylyq júıe jumysynyń deńgeıin arttyrý, bankterdi «nashar kredıtterden» aryltý qajet.

«Ekinshiden, «Báıterek» holdınginiń damý ınstıtýttarynyń tıimdiligin arttyrý qajet. Olar bar qarjyny tıimdi paıdalanyp, ekonomıkany tezirek basymdyqty sektorǵa jetkizse, bul da qosymsha ınvestıtsııa tartýǵa septigin tıgizer edi. Sonymen qatar otyrys barysynda tikeleı, ásirese shetel ınvestıtsııasyn tartý joldaryn keńinen talqyladyq», - dedi basqarma tóraǵasy.