2020 jylǵa deıin Qazaqstan ózin-ózi qus etimen qamtamasyz etý kerek - QR Qus ósirýshiler odaǵynyń prezıdenti
ALMATY. 12 qarasha. QazAqparat - Qazaqstanda qus sharýashylyqtary qazir jylyna 3,7 mıllıard jumyrtqa, 136 myń tonna et óndirýde. Bul týraly Qazaqstan Qus ósirýshiler odaǵynyń prezıdenti Rýslan Sháripov QazAqparat tilshisine bergen suhbatynda aıtty.
«Óndirilgen jumyrtqanyń kólemi eldi tolyq qamtamasyz etip, artylǵanyn eksporttaýǵa múmkindik beredi. Al qus eti boıynsha biz qazir ishki naryqtyń 60 paıyzyn ǵana qamtamasyz etip otyrmyz. Jalpy qus eti boıynsha bizdiń ishki naryqtyń suranysy jylyna 250-300 myń tonnany quraıdy», - deıdi R.Sháripov. Onyń aıtýynsha, qazaqstandyq óndirisshiler Dúnıejúzilik saýda uıymy turmaq, Keden odaǵyndaǵy Reseı men Belarýspen básekelestikke áli tolyq daıyn emes. Óıtkeni elimizde qus sharýashylyǵyna qajetti tuqym men qural-jabdyqtardyń bári shetelden eksporttalady. Memlekettik sýbsıdııanyń arqasynda ǵana qazir Keden odaǵyndaǵy seriktes eldermen básekeles bolyp otyr.
«Reseıde qazir jumyrtqanyń baǵasy 2 ese kóterilip ketti. Óıtkeni olarda byltyr bıdaıdyń ónimi nashar bolǵandyqtan sharýashylyqtary bıyl qustyń basyn azaıtyp, 500 mlrd. jumyrtqaǵa jumyrtqa kem óndirdi. Shekaralas aýdandardan reseılikter arzan jumyrtqany kóp satyp alatyn bolsa, onda tapshylyq paıda bolýy múmkin bolǵandyqtan, biz de baǵany eriksiz kóterdik. Qazir olardan 1-2 teńgege tómen ustap otyrmyz. Ol - ýaqytsha shara», - deıdi Rýslan Ismaıyluly.
QR Qus ósirýshileri odaǵy basshysynyń sózine qaraǵanda, Qazaqstanda qazir 54 qus fabrıkasy bar. Onyń 21-i et baǵytynda. Úkimettiń 2020 jylǵa deıingi baǵdarlamasy boıynsha 2020 jylǵa deıin Qazaqstan ózin-ózi qus etimen qamtamasyz etý kerek. Qazir 3-4 fabrıka salynyp jatyr, bul mindet aldaǵy 2-3 jylda júzege asýy múmkin.
