2020 jylǵa deıin qalalar ortalyqtandyrylǵan sý júıesimen 100 paıyzǵa qamtylady
ASTANA. 19 qarasha. QazAqparat - Qazaqstan 2020 jylǵa deıin qalalardy ortalyqtandyrylǵan sýmen jabdyqtaý júıesimen 100 paıyz qamtymaq. Búgin Úkimet otyrysynda «Aq bulaq» baǵdarlamasynyń júzege asyrylýy jaıynda baıandama jasaǵan elimizdiń Óńirlik damý mınıstri Bolat Jámishev osylaı dedi.
«2020 jylǵa deıin qalalardy sýmen jabdyqtaý 100, aýyldyq eldi mekenderdi 80 paıyz, qalalardy sý burýmen 100, al aýyldardy 20 paıyz qamtamasyz etý josparlanýda. 2011-2013 jyldar aralyǵynda baǵdarlama is-sharalaryn júzege asyrýǵa 315,1 mlrd. teńge baǵyttalady. 2013 jyly baǵdarlamada josparlanǵan mejege qol jetkiziledi», - dedi ol.
Mınıstrdiń atap ótýinshe, 2011-2012 jyldarda aýyldyq eldi mekenderdi sýmen jabdyqtaý jáne sý burýdaǵy 492 jobany júzege asyrýǵa 62,5 mlrd. teńge baǵyttalǵan. Al jyl basynda josparlanǵan 316 nysannyń 225-si paıdalanýǵa berilgen.
«Jospardyń oryndalmaýynyń negizgi sebepteri: jergilikti bıýdjetten qarjylandyrylmaýy, tıimsiz josparlanýy, ákimdikter tarapynan qurylys barysyna baqylaýdyń álsiz bolýy», - dedi B.Jámishev.
