2020 jylǵa deıin elimizdegi balalar 100 paıyz mektepke deıingi bilimmen qamtamasyz etiledi- Úkimet
TANA. 6 qyrkúıek. QazAqparat /Aıdar Ospanalıev/ - 2020 jylǵa deıin elimizdegi balalar 100 paıyz mektepke deıingi bilimmen qamtamasyz etiledi. Bul týraly búgin «Táýelsizdikke 20 jyl: Qazaqstan Respýblıkasyndaǵy adam kapıtalyn damytýdyń sapasy men bolashaǵy» atty halyqaralyq konferentsııa barysynda Premer-Mınıstrdiń orynbasary Erbol Orynbaev málim etti.
Onyń sózine qaraǵanda, aldaǵy ýaqytta eldegi 2 ýnıversıtet álemdegi eń úzdik ýnıversıtetterdiń birine aınalýy kerek. Al adam ómiriniń uzaqtyǵy 72 jasqa deıin uzarady. Ana ólimi 2 esege kemip, bala ólimi 3 esege azaıady. Sondaı-aq eldegi jumyssyzdyq 5 paıyzdan aspaıtyn bolady. «Eger biz dál búgingi qarqynmen damı beretin bolsaq, bul mindetterdi asyra oryndaıtyndyǵymyzǵa senimdimin»,-dedi Úkimet basshysynyń orynbasary.
Onyń aıtýynsha, Úkimet osy ýaqytta atalǵan mindetterdi júzege asyrýǵa barynsha kúsh salyp otyr. «Qazirgi tańda Úkimet «Balapan» baǵdarlamasyn júzege asyrýda. Oǵan sáıkes, 2020 jylǵa deıin
3-pen 5- ke deıingi aralyqtaǵy búldirshinderdiń barlyǵy mektepke deıingi bilimmen qamtamasyz etilýi kerek. Birinshiden bul balanyń damýyna zor yqpal etedi. Sebebi tap osy úsh jyldyń ishinde balalar orta mekteptegi bilimge para-par bilim alatyndyǵyn ǵalymdar aıtyp otyr. Sondyqtan balalardyń ıntellektisin damytý úshin bul óte mańyzdy shara. Onyń ústine pedagog mamandar da mektepke keletin balanyń jaqsy daıyndyqpen kelgendigi durys ekendigin aıtýda»,-dedi E.Orynbaev.
Onyń derekterinshe, Úkimet osy baǵytta atqarylyp jatqan jumystardyń nátıjelerin kórip te úlgerdi. Aıtalyq, 2010 jyly mektepke deıingi balalardyń 30 paıyzy bilimmen qamtylsa, «Balapan» baǵdarlamasynyń arqasynda bul kórsetkish bıyl 55,6 paıyzǵa jetip otyr»,-dedi Premer-Mınıstrdiń orynbasary.
