2020 jylǵa deıin elimizde 4,5-5 myńdaı halyqaralyq deńgeıdegi teńizshiler daıyndaý qajet - «QazTeńizFlot»
ALMATY. 24 mamyr. QazAqparat - «QazMunaıGaz» kompanııasyna 2020 jylǵa deıin shıki munaı tasymaldaıtyn 20-40 shaqty tanker kerek. Bul týraly búgin Almatydaǵy Qazaqstan teńiz akademııasy kýrsanttarynyń alǵashqy kýrsty aıaqtaýyna arnalǵan saltanatty jıynda aıtyldy.
«Búginde teńiz floty memlekettiń syrtqy saıasatynyń quraly bolyp otyr. Jyl saıyn teńiz tasymaldaýynyń ósýin baıqap otyrmyz. Máselen «QazMunaıGaz» jelisindegi enshiles kásiporyn «QazTeńizFlottyń» málimetterine qaraǵanda, 2020 jyly respýblıkada keme júrgizýdiń ósýine oraı 400-500 shamasynda qosalqy kemeler kerek. Bul qazirgi kórsetkishten 2 ese joǵary», - deıdi «QazMunaıGaz»AQ-nyń basqarma tóraǵasynyń orynbasary Maǵzum Myrzaǵalıev. Onyń aıtýynsha, qazir komandalyq quramnyń 21 paıyzy ǵana - qazaqstandyqtar. Qalǵany ózge eldiń azamattary bolyp otyr. Sondyqtan 2020 jylǵa deıin elimizde 4,5-5 myń halyqaralyq deńgeıdegi teńizshiler daıyndaý kerek.
