2020 jylǵa deıin ekonomıkanyń barlyq salasyn qamtıtyn 550 kásibı standart ázirleýdi aıaqtaımyz - T. Dúısenova
«Memleket kásipodaqtardy eńbek jaǵdaıyn jaqsartý isindegi strategııalyq seriktesi retinde qoldap, qyzmetterin yntalandyra beretindigin atap ótkim keledi. Búginde kásipodaqtar qaýipsiz eńbek jaǵdaıyn qurý, kásibı standarttar ázirleý men qyzmetkerlerdiń biliktiligin taný boıynsha usnystar ázirleý protsesine qatysý múmkindigine ıe bolyp otyr. Biz qazirgi ýaqytta biliktiliktiń ulttyq júıesin engizý ústindemiz. Biz jyl saıyn jumys berýshiler usynatyn shamamen 20-25 myń bos jumys ornynyń qamtylmaı qalatyndyǵyn aıtamyz. Bul jumys berýshiler qoıyp otyrǵan talaptarǵa ár ýaqytta da bizdiń joǵary, orta oqý oryndary túlekteriniń nemese oǵan deıin belgili bir mamandyǵy bar jumysshynyń saı kele bermeýinen oryn alýda»,- dedi mınıstr.
Onyń atap ótýinshe, osyǵan oraı mınıstrlik jumys berýshilermen birlese otyryp, biliktiliktiń ulttyq shegin engizetin bolady. ıAǵnı, joǵary oqý oryndary men kolledjderge arnalǵan kásibı standarttar ázirlenedi. Aıta keterligi, qazirgi ýaqytta jumys berýshiler ázirlegen kásibı standarttarmen jumys isteıtin 10 joǵary oqý orny men 11 kolledj Úkimet tarabynan iriktelip alynǵan bolatyn.
«Bul jumystar qazirgi ýaqytta Úkimet tarabynan bizdiń áleýmettik seriktesterimizben birge júrgizilýde jáne 2020 jylǵa deıin ekonomıkanyń barlyq salalaryn qamtıtyn 550 kásibı standart ázirleýdi aıaqtaǵymyz keledi. Bul baǵyttar 2030 jylǵa qaraı óniristik jaraqattaný men kásibı syrqattaný kórsetkishterin aıtarlyq azaıtyp, álemniń damyǵan elderinde deńgeıge jetýge septigin tıgizedi dep úmittenemiz», - dedi T.Dúısenova.