2020 jylǵa deıin 30 mln. sharshymetrge jýyq jeke turǵyn úı salynatyn bolady

  ASTANA. 6 naýryz. QazAqparat - «Qoljetimdi turǵyn úı - 2020» jańa baǵdarlamasynyń jeke turǵyn úı qurylysy baǵytynda jyl saıyn 3 mln. sharshymetrden astam úı salý josparlanyp otyr.

 Bul týraly búgin Úkimet otyrysynda qurylys jáne turǵyn úı-kommýnaldyq sharýashylyq agenttiginiń tóraǵasy Serik Nokın málim etti.

«Jańa baǵdarlamada jeke turǵyn úı qurylysy men ınjenerlik-kommýnıkatsııalyq ınfraqurylymnyń qurylystary qamtylyp otyr», - dep toqtaldy agenstvo basshysy.

Onyń sózine qaraǵanda, 2011 jyly jeke turǵyn úı qurylysynyń úlesi jalpy qurylys kóleminde 55 paıyzdy qurady. Bul qarqyndy qamtamasyz etý úshin ınjenerlik jelilerdiń qurylystaryn qarjylandyrýdy arttyrý kerek.

«Respýblıkalyq bıýdjettik komıssııamen  ınjenerlik-kommýnıkatsııalyq ınfraqurylymdy qarjylandyrýdy 11 mlrd. teńgege arttyrý usynysy qoldaý tapty. Osy arqyly ınfraqurylymdy qarjylandyrý 51 mlrd. teńgege deıin jetkizilmek», - dedi S. Nokın.

Onyń aıtýynsha, 2013 jyldan bastap jyl saıyn qarjylandyrý 60 mlrd. teńgeni quraıdy. Jalpy, 2012-2020 jyldar aralyǵynda ınjenerlik ınfraqurylymdarǵa 531 mlrd. teńge qajet bolady.

«Nátıjesinde baǵdarlama aıaqtalǵan kezde 29 mln. sharshymetr jeke turǵyn úı salynatyn bolady. Atap aıtqanda jyl saıyn 3,2 mln. sharshymetrdiń osyndaı úıler salynatyn bolady», - dep túıindedi sózin S. Nokın.