2020 jylǵa arnalǵan «Balapan» baǵdarlamasyn biz kelesi jyly oryndaımyz - óńir ákimi
ASTANA. QazAqparat - Qyzylorda oblysynyń bıýdjeti 211,7 mlrd. teńgeni qurap, 26,5 mlrd. teńgege ulǵaıdy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Qyzlorda oblysynyń ákimi Qyrymbek Kósherbaev aıtty.
«Qyzylorda oblysynyń bıýdjeti 211,7 mlrd. teńgeni qurap, 26,5 mlrd. teńgege ulǵaıdy. Búginde qupııa emes, 2012 jyly áleýmettik-ekonomıkalyq damý kórsetkishteri boıynsha el boıynsha eń sońǵy, 16-orynda boldy. Al 2013 jyldyń qorytyndysy boıynsha úzdik bestikke endik. Búginde osy deńgeıde ustap otyrmyz», - dep atap ótti ol.
Onyń aıtýynsha, búginde óńirde áleýmettik salany qarjylandyrý máselesi de ońtaıly sheshilýde.
«Sonymen qatar, búginde áleýmettik salany qarjylandyrýǵa keler bolaq, bizdiń oblysta jan basyna shaqqandaǵy bólinetin qarajat respýblıka boıynsha eń kóbi bolyp otyr. Ár adamǵa 158 myń teńge bólinedi. Bul jyldar boıy artta alǵan áleýmettik salany damytýǵa kómegin tıgizedi. Degenmen, bul ońaı jumys emes, alaıda dınamıkany kórip otyrsyzdar. Mysal úshin 2012 jyly biz salyq túsimi boıynsha el boıynsha 12-14-orynda boldyq. Al 2013 jyldyń qorytyndysy boıynsha 4-orynǵa kóterildik», - dedi ákim. Onyń aıtýynsha, 3-6 jas aralyǵyndaǵy balalardy balabaqshamen qamtý 90 paıyzǵa jetti. «Sondyqtan, Memleket basshysynyń balalardy balabaqshamen 2020 jylǵa deıin tolyq qamtýǵa baılanysty «Balapan» baǵdarlamasyn biz kelesi jyly oryndaımyz dep josparlap otyrmyz. Onyń ústine Qyzylorda oblysy tabıǵı ósim boıynsha úzdik úsh óńirdiń qataryna kirip, ósý qarqyny jyl saıyn 4-7% qurap otyr. Statıstıka boıynsha óńirde 754 myń adam turady delinse, medıtsınalyq tirkeýlerde 823 myń adam bar. Men sońǵysyna kóbirek júginemin. Óıtkeni, óńirde turaqty turatyn adamdardyń barlyǵy medıtsınalyq tirkeýge turady. Qazirgi ósý qarqynymen biz 10-15 jylda mıllıondyq kórsetkishten asamyz dep oılaımyn. Sondyqtan, áleýmettik nysandardy adyn ala salý maqsatyn alǵa qoıý qajet», - dep atap ótti Q. Kósherbaev.
