2020 jyldyń 2-toqsanynda elimizdegi jumyssyzdyq 10,8 paıyzǵa jetti
«Aǵymdaǵy daǵdarys eńbek naryǵynda basym túrde jumys ýaqytynyń qysqarýy men halyq tabysynyń azaıýyna áser etti. Resmı statıstıka boıynsha 2-toqsanda jumyssyzdyq deńgeıi 5 paıyzǵa deıin artty. Degenmen, ýaqytsha jumyspen qamtylmaǵan adamdar sanynyń ulǵaıýyn eskersek, ol qosymsha 536 myń adam, ıaǵnı belsendi jumyspen qamtýdan tys qalǵan adamdardyń úlesi 10,8 paıyzdy quraıdy. Muny shynaıy jumyssyzdyq desek te bolady», - dedi mınıstr Májilistegi Úkimet saǵatynda.
Onyń aıtýynsha, jumys ýaqytyn paıdalaný kórsetkishteriniń tómendeýi baıqalady. Aptasyna 36 saǵattan artyq jumys isteıtin adamdar sany 542 myńǵa qysqarǵan.
«Jalpy alǵanda daǵdarys kezinde halyq tabysynyń kúrt tómendeýi oryn almady. Biraq ósý qarqyny ótken jylmen salystyrǵanda edáýir tómendedi. Óz kezeginde halyq tabysynyń quramynda áleýmettik transferler, ıaǵnı, áleýmettik tólemder úlesi ótken jylmen salystyrǵanda 23 paıyzdan 31 paıyzǵa deıin artqanyn kórýge bolady», - dedi Birjan Nurymbetov.
