2020 jyldyń 11 aıynyń qorytyndysy: QR ekonomıkasynyń bazalyq salalary ósim kórsetýde
NUR-SULTAN. QazAqparat - QR Premer-Mınıstri Asqar Mamınniń tóraǵalyǵymen ótken Úkimet otyrysynda elimizdiń 2020 jylǵy qańtar-qarashadaǵy áleýmettik-ekonomıkalyq damýynyń qorytyndylary jáne respýblıkalyq bıýdjettiń atqarylýy qaraldy, dep jazady primeminister.kz.
Ekonomıkanyń, bank salasynyń jaı-kúıi, respýblıkalyq bıýdjettiń atqarylýy, memlekettik satyp alýdaǵy jergilikti qamtý týraly ulttyq ekonomıka mınıstri R. Dálenov, Ulttyq bank tóraǵasy E. Dosaev, qarjy mınıstri E. Jamaýbaev, ónerkásiptegi, energetıka sektoryndaǵy ahýal jáne áleýmettik mańyzy bar azyq-túlik taýarlarynyń baǵalary týraly ındýstrııa jáne ınfraqurylymdyq damý mınıstri B. Atamqulov, energetıka mınıstri N. Noǵaev, saýda jáne ıntegratsııa mınıstri B. Sultanov baıandady. Bıylǵy on bir aıdyń qorytyndysy boıynsha ekonomıkanyń bazalyq salalarynda oń ósim qarqyny baıqalady.
Óńdeý ónerkásibinde 3,3%-ǵa, onyń ishinde azyq-túlik ónimderi óndirisinde 3,6%-ǵa, farmatsevtıkada 39,5%-ǵa, daıyn metall buıymdary óndirisinde 19,6%-ǵa, mashına jasaýda 16,4%-ǵa, onyń ishinde avtomobıl jasaýda 52,6%-ǵa, sondaı-aq qaǵaz óndirisinde 14,6%-ǵa jáne jeńil ónerkásipte 15,5%-ǵa ósim qamtamasyz etildi.
Qurylys kólemi 12,1%-ǵa, turǵyn úıdi paıdalanýǵa berý 9,3%-ǵa nemese shamamen 12,1 mln sharshy metrge ulǵaıdy. Aýyl sharýashylyǵynda 5,3%-ǵa turaqty ósim qamtamasyz etildi. QR altyn-valıýta rezervteri jáne Ulttyq qordyń aktıvteri bıylǵy 1 qarashadaǵy jaǵdaı boıynsha $89,9 mlrd qurady. Temir kenin (+0,6%) jáne ózge de paıdaly qazbalardy (+2,1%) óndirý sekildi taý-ken sektorynyń mańyzdy baǵyttary boıynsha oń dınamıka saqtalýda. Bul rette OPEK+ qol jetkizilgen ýaǵdalastyqtardy oryndaý qajettiligi jaǵdaıynda munaı óndirý kólemi tómendedi (-5,5%). Qyzmet kórsetý sektorynyń jandanýy baıqalady.
Qarashada qazan aıymen salystyrǵanda saýda (+17,1%), ómir súrý jáne tamaqtaný (+10,5%), baılanys (+4,5%) salalarynda iskerlik belsendiliktiń ósýi tirkeldi. «Eldegi epıdemıologııalyq jaǵdaıdy turaqtandyrý, sondaı-aq ony odan ári saqtaý ekonomıkanyń ósýin jaqsartýǵa aıtarlyqtaı yqpal etedi», — dedi A. Mamın.
Aqmola, Aqtóbe, Almaty, Jambyl, Qostanaı, Mańǵystaý, Pavlodar, Soltústik Qazaqstan jáne Túrkistan oblystary, Shymkent jáne Nur-Sultan qalalary negizgi 7 kórsetkishtiń 5-i boıynsha áleýmettik-ekonomıkalyq damý ósimin qamtamasyz etti. Shyǵys Qazaqstan, Qaraǵandy oblystarynda jáne Almaty qalasynda 4 kórsetkish boıynsha oń dınamıkaǵa qol jetkizildi.
Úkimet basshysy Pavlodar, Túrkistan, Aqtóbe oblystaryndaǵy áleýmettik mańyzy bar azyq-túlik taýarlary baǵasynyń ósý qarqynynyń artqanyna nazar aýdardy. Baǵanyń eń tómen ósimi Aqmola, Qyzylorda, Soltústik Qazaqstan, Shyǵys Qazaqstan, Mańǵystaý oblystarynda jáne Nur-Sultan qalasynda tirkelgen.
«Óńirlerdiń ákimderi áleýmettik mańyzy bar taýarlar men tarıfterdiń baǵasyn turaqtandyrý boıynsha sharalar qabyldaýy tıis. Bul jumysqa qajetti quraldar bar. Baǵa máselesi turaqty baqylaýda bolǵany jón», — dedi A. Mamın.
Úkimet basshysy bıýdjettiń kiris bóligin qamtamasyz etý jónindegi jospardy 100% oryndaý, sondaı-aq qarjy jylynyń sońyna deıin bıýdjet qarajatyn tolyq ári tıimdi ıgerý qajet ekenin atap ótti.
