2020 jyldy Volonterlar qozǵalysynyń jyly dep jarııalaýdy qoldaımyn - QR Prezıdenti
QOSTANAI. QazAqparat - Memleket basshysy Qasym-Jomart Toqaev Qostanaıda ótip jatqan jastar forýmy barysynda 2020 jyldy Volonterlar qozǵalysynyń jyly dep jarııalaýdy qoldaıtynyn málimdedi, dep habarlaıdy QazAqparat.
Qasym-Jomart Toqaev Qostanaıda jańadan ashylǵan Jastar saraıyndaǵy forým barysynda eriktilermen kezdesti. QR Prezıdenti eldiń bolashaǵy jastardyń qolynda ekenin taǵy bir eske saldy.
«Jas dostar! Búgin men barlyqtaryńyzdy osy zalda qaýyshtyrǵanyma qýanyshtymyn. Sizder - eldiń bolashaǵysyzdar. Qazaqstan - jastardyń memleketi. Bizdi álemniń ár memleketi tanıdy, bizben sanasady. Bul eldiń tarıhı jetistikteriniń biri emes pe!? QR Prezıdenti retinde men árqashan volonterlardyń qozǵalysyn qoldaıtynymdy jetkizemin», - dedi Memleket basshysy.
Prezıdent eriktiler qozǵalysy týraly BUU-da jumys istep júrgen ýaqyttan beri biletinin aıtty.
«Men sol kezde de eriktilerge múmkindik jasaý kerektigin aıtyp júrdim. Sondyqtan Sizderdiń kelesi jyldy Volonterlar qozǵalysynyń jyly dep jarııalaý týraly usynystaryńyzdy tolyǵymen qoldaımyn. Eriktiler - jany taza adamdar. Olar - eldiń shynaıy patrıoty, sol úshin de qurmetim sheksiz. Belsendi azamattyq ustanymdaryńyz memlekettiń damýyna aıtarlyqtaı septigin tıgizetini sózsiz», - dep túıdi Qasym-Jomart Toqaev.
Eske salsaq, Qasym-Jomart Toqaev Qostanaı oblysyna jumys sapary barysynda Qazaqstan-Reseı jastarynyń halyqaralyq forýmyna qatysty.
Sondaı-aq, QR Prezıdenti Úkimetke eriktiler qozǵalysyn qoldaýdy tapsyrdy
