2020 jyldary jabaıy ańdardyń úshten ekisi joıylady
ASTANA. QazAqparat - Adamzattyń áreketiniń saldarynan Jer betinde jabaıy ańdar popýlıatsııasy joıylyp barady. Búkilálemdik jabaıy tabıǵat qorynyń (WWF) jarııa etken esebi boıynsha 2020 jyldary olardyń sany 1970 jylǵymen salystyrǵanda úshten ekige azaıady. Quryp bara jatqan ańdar qatarynda sútqorektiler, balyqtar, qustar, qosmekendiler jáne t.b. bar.
WWF esebin eki jylda bir ret jarııalaıdy. Sońǵysynda ótken dáýirlerde ańdardyń quryp ketýine adamnyń yqpaly taldanǵan. Atap aıtar bolsaq, 1970- 2012 jyldar aralyǵynda jabaıy ańdar sany 58 paıyzǵa qysqarǵan. Eger adamzat osyǵan qarsy shara qoldanbasa taıaý bolashaqta popýlıatsııanyń joıylýy qarqyn alyp ketýi múmkin.
Ǵalymdar osy derekterdi nazarǵa ala otyryp aldaǵy ýaqytta Jer betindegi 40 jyl burynǵy bolǵan haıýanattardyń úshten biri ǵana qalýy múmkin dep qaýiptenedi.
Eske sala ketsek, WWF boljamy janýarlardyń túrine emes jalpy sanyna qatysty. Alaıda sarapshylar popýlıatsııanyń kúrt azaıýy kóptegen janýarlar túriniń joıylýyna ákelip soǵýy múmkin degen qaýpin jasyrmaıdy.
