2020 jyldary 1 mıllıonnan astam búldirshin balabaqshamen qamtylady
Bul týraly búgin Ortalyq kommýnıkatsııalar qyzmetindegi brıfıngte QR Bilim jáne ǵylym mınıstrligi Mektepke deıingi, orta bilim jáne aqparattyq tehnologııalar departamentiniń dırektory Jańyl Jontaeva málim etti.
«Aǵymdaǵy oqý jylynda birinshi synypqa 70 myńnan astam bala keldi. Mektepke deıingi bilim berý uıymdarynda da balalardyń sany kóbeıgeni belgili. Elbasynyń tapsyrmasyna sákes, 2020 jylǵa qaraı júz paıyz balabaqshamen qamtý máselesi júktelgen bolatyn. Búginde 727 myń bala mektepke deıingi bilim berý uıymynda tárbıe alyp jatsa, 2020 jyldary 1 mln. 60 myńnan astam bala balabaqshamen qamtylady»,- dedi J. Jontaeva.
Mınıstrliktiń málimetine qaraǵanda, elimiz boıynsha 8467 mektepke deıingi uıym jumys isteıdi. Onyń ishinde 3832 balabaqsha men 4635 shaǵyn ortalyq bar.
Atap aıtqanda, balabaqsha máselesin jaqyn arada túbegeıli sheshý úshin Ulttyq qor qarajaty esebinen de óńirlerde mektepke deıingi uıymdardyń qurylysy bastalady.
