2020 jyldan jergilikti bıýdjetterge ShOB-tan túsetin korporatıvtik tabys salyǵy berilmek

NUR-SULTAN. QazAqparat – QR Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine Qazaqstannyń ákimshilik-aýmaqtyq qurylysy, memlekettik basqarý júıesin jáne bıýdjetaralyq qatynastardy jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Osy zań jobasy tıisti qujattarǵa sáıkes ázirlendi. Bul turǵyda elordanyń ataýy ózgerýi boıynsha QR Prezıdentiniń Jarlyǵy, shaǵyn jáne orta bıznesten túsetin korporatıvtik tabys salyǵyn jergilikti bıýdjetterge berý bóligindegi Memleket basshysynyń 2018 jylǵy 10 qańtardaǵy Joldaýy, QR Memlekettik kúzet qyzmetinde qaıta qurý boıynsha Memleket basshysynyń Jarlyǵy, sondaı-aq Qazaqstan Respýblıkasynyń «Syrbar» syrtqy barlaý qyzmetin QR Ulttyq qaýipsizdik komıtetine biriktirý jolymen qaıta qurý boıynsha Memleket Basshysynyń Jarlyǵy eskerildi.

Zań jobasy Jer, Bıýdjet, Qylmystyq-protsestik, Azamattyq protsestik kodeksterine, «Salyq jáne bıýdjetke tólenetin basqa da mindetti tólemder týraly» kodekske jáne 12 zańǵa túzetýler engizýdi kózdeıdi.

«Elorda ataýynyń ózgerýine baılanysty 4 kodeks pen 7 zańǵa túzetýler engiziledi. Zań jobasynda keıbir kúsh qurylymdaryn qaıta uıymdastyrý bóliginde ózgerister engizý kózdelgen. Osylaısha, Qazaqstan Respýblıkasy Memlekettik kúzet qyzmetiniń qaıta uıymdastyrylýyna, sondaı-aq QR Ulttyq qaýipsizdik komıtetine Qazaqstan Respýblıkasy «Syrbar» Syrtqy barlaý qyzmetiniń qosylýyna baılanysty zańnamalyq aktilerge ózgerister engizý kózdelip otyr», - dedi Ulttyq ekonomıka mınıstri Rýslan Dálenov.

Aıta keteıik, 2020 jyldan bastap jergilikti bıýdjetterge shaǵyn jáne orta bıznesten túsetin korporatıvtik tabys salyǵyn berý usynylýda.

«Respýblıkalyq bıýdjetke iri kásipkerlik sýbektilerinen ǵana korporatıvtik tabys salyǵynyń túsimderi túsetin bolady. Sondaı-aq oblystyq máslıhattarǵa shaǵyn jáne orta bıznesten túsetin korporatıvtik tabys salyǵyn oblystyq jáne aýdandyq bıýdjet arasynda bólý normatıvin belgileý quqyǵy beriletin bolady.

Jergilikti bıýdjetterge korporatıvtik tabys salyǵyn berý óńirler ekonomıkalarynyń, shaǵyn jáne orta bıznestiń damýyn yntalandyratyn bolady ári jergilikti bıýdjetterdiń tabystaryn ulǵaıtady. Joǵaryda aıtylǵan túzetýler zańnamanyń keıbir normalaryn sáıkestendirýge, bıýdjetaralyq qatynastar men memlekettik basqarý júıesin jetildirýge baǵyttalǵa», - dedi vedomstvo basshysy.

Jalpy otyrys barysynda Parlament Májilisiniń tóraǵasy Nurlan Nyǵmatýlın korporatıvtik tabys salyǵyn jergilikti bıýdjetke berý sheshimi óte durys ekenin atap ótti.

«Sondyqtan endi jergilikti atqarýshy organdar barlyq qarjyny jınap, tek qana halyqtyń eń mańyzdy máselelerin sheshýge jumsaýy kerek. Bul qarjynyń negizsiz jumsalýyna jol berilmeýi kerek. Osy baǵyttaǵy jumystardy Úkimet baqylaýǵa alýy kerek», - dedi N. Nyǵmatýlın.