2020 jyldan bastap Mınsk - Aqtaý áýe reısi iske qosylady

MINSK. QazAqparat - Belarýs Respýblıkasymen áýe qatynasyn keńeıtý boıynsha kelisimderge qol jetkizildi, dep habarlaıdy QazAqparat Indýstrııa jáne ınfraqurylymdyq damý mınıstrliginiń baspasóz qyzmetine silteme jasap. .

2 jeltoqsanda qazaqstandyq delegatsııa Belarýs Respýblıkasynyń avıatsııa bılikterimen kelissóz júrgizdi.

«Memleket basshysynyń tapsyrmasymen engizilgen «ashyq aspan» rejımi aıasynda eki el arasyndaǵy ushý jıilikteriniń sany artty, sondaı-aq eki eldiń taǵaıyndalǵan áýe kompanııalaryna ushý kezinde kodtardy birlesip paıdalaný týraly kommertsııalyq kelisimder jasasý múmkindigi berildi» delingen habarlamada.

Qol jetkizilgen ýaǵdalastyq nátıjesinde «Belavıa» áýe kompanııasy Mınskiden Almatyǵa reısterdi aptasyna 5-ten 7 reıske deıin ulǵaıtady, sondaı-aq 2020 jyldyń jaz kezeńinen bastap Aqtaýǵa aptasyna 3 reıs jıilikpen turaqty reıs ashady.