2020 jyldan bastap MÁMS júıesimen halyqtyń 94,5 paıyzyn qamtý josparlanýda - mınıstr
NUR-SULTAN. QazAqparat - Densaýlyq saqtaý mınıstrliginiń boljamy boıynsha derbes tóleýshilerdiń sany shamamen 1 mln adamdy quraıdy, dep habarlaıdy QazAqparat tilshisi.
«1 mln adamnyń ishinde 770 myń adam - ózin-ózi jumyspen qamtyǵan azamattar. Osyǵan baılanysty, óńirlerdiń ákimderi 2019 jyldyń 1 qazanyna deıin ózin-ózi jumyspen qamtyǵan adamdardyń mártebesin naqtylaý, medıtsınalyq-sanıtarlyq alǵashqy kómek uıymdaryna bekitý jóninde qajetti sharalar qabyldaýy qajet. Tegin medıtsınalyq kómektiń jáne medıtsınalyq saqtandyrý júıesiniń jańa paketterin engizý birinshi kezekte halyqtyń áleýmettik turǵydan osal toptary úshin medıtsınalyq kómektiń qoljetimdiligin arttyrýǵa baǵyttalǵan. Búgin zańnamamen jekelegen medıtsınalyq qyzmetterdi alý úshin azamattardyń áleýmettik turǵydan osal 8 sanaty anyqtaldy. Olar: balalar, júkti áıelder, kópbalaly analar, zeınetkerler jáne basqalar», - dedi Densaýlyq saqtaý mınıstri Eljan Birtanov Úkimet otyrysynda.
Mınıstrdiń aıtýynsha, 2020 jyldan bastap medıtsınalyq saqtandyrý júıesin engizý kezinde áleýmettik turǵydan osal halyqtyń 15 sanaty zańmen anyqtalǵan. Bul adamdar (olardyń sany shamamen 10,9 mln adam) memleket tarapynan saqtandyrylady.
«Medıtsınalyq saqtandyrý júıesin engizý sheńberinde birqatar qyzmetterdiń qoljetimdiligi keńeıtiledi. Olardyń sanatyna qymbat turatyn dıagnostıkalyq qyzmetter boıynsha qarjylandyrý 3 ese ósedi. Stomatologııalyq qyzmetterdi qarjylandyrý 2,3 ese ulǵaıady. Saqtandyrylǵan tulǵalar úshin medıtsınalyq saqtandyrý júıesiniń paketi medıtsınalyq kómektiń qoljetimdiligin aıtarlyqtaı arttyrýdy kózdeıdi. Atap aıtqanda, konsýltatsııalyq jáne dıagnostıkalyq kómekti qarjylandyrý 3 esege (80 mlrd tg), ońaltý jáne qalpyna keltirý kómegin qarjylandyrý 2,7 esege (39 mlrd tg) ulǵaıtylatyn bolady», - dedi ol.
