2020 jyl Meıirbıkeler jyly bolyp jarııalandy – DDU
NUR-SULTAN. QazAqparat – Dúnıejúzilik densaýlyq saqtaý assambleıasy 2020 jyldy Meıirbıkelik jáne akýsherlik qyzmet salasyndaǵy qyzmetkerlerdiń halyqaralyq jyly dep jarııalady, dep habarlaıdy QazAqparat Dúnıejúzilik densaýlyq saqtaý uıymynyń resmı saıtyna silteme jasap.
«Medbıkeler men akýsherler densaýlyq saqtaý salasynda qyzmet kórsetýde mańyzdy ról atqarady. Olar óz ómirin analar men balalardyń qamqorlyǵyna arnaıdy, ómirlik mańyzdy ekpeler salyp, medıtsınalyq usynys-keńesterin beredi, qart adamdarǵa kútim jasaıdy. Jalpy alǵanda halyqtyń densaýlyq saqtaý salasyndaǵy negizgi kúndelikti qajettilikterin qanaǵattandyrady. Olar kóbine jergilikti turǵyndar úshin medıtsınalyq kómek kórsetetin alǵashqy jáne jalǵyz adam bolyp otyr», - delingen DDU saıtynda.
Málim etilgendeı, 2030 jylǵa deıin densaýlyq saqtaý qyzmetterimen jalpylaı qamtýǵa qol jetkizý úshin meıirbıkelik jáne akýsherlik salada 9 mln qosymsha jumys ornyn qurý qajet.
«Sondyqtan Dúnıejúzilik densaýlyq saqtaý assambleıasy 2020 jyldy Meıirbıkelik jáne akýsherlik qyzmet salasyndaǵy qyzmetkerlerdiń halyqaralyq jyly dep jarııalaý týraly sheshim qabyldady», - delingen aqparatta.
