2020 jyl qorytyndysy: Munaı arzandap, kómir qymbattady

NUR-SULTAN. QazAqparat – 2020 jyly ónerkásip salasyndaǵy otandyq óndirýshilerdiń baǵasy 4,2 paıyzǵa tómendedi. Mundaı derekti QR Strategııalyq josparlaý jáne reformalar agenttiginiń Ulttyq statıstıka bıýrosy usyndy, dep habarlaıdy QazAqparat tilshisi.

Jyl ishinde taý-ken óndirýde baǵanyń munaıǵa - 22,8, tabıǵı gazǵa 8,4 paıyzǵa tómendeýi, metall kenderine - 36,1, kómirge 2,5 paıyzǵa joǵarylaýy baıqaldy.

Óńdeý salasynda baǵa mysqa - 32,7, asyl metaldarǵa - 25,6, alıýmınııge - 19,8, myryshqa - 19,4, qara metaldar ılegine - 7,9, qorǵasynǵa 2,9 paıyz joǵarylady, ferroqorytpalarǵa 6,8 paıyz tómendedi. Munaı ónimderinen mazýt - 38,1, dızel otyny - 13,3, benzın 10,2 paıyz arzandady, suıytylǵan propan jáne býtan 6,5 paıyz qymbattady.

Azyq-túlik ónimderinen óndirýshilerde baǵa ósimdik maıyna - 41,1, qantqa - 19,9, jarmalarǵa - 15,5, qara bıdaı unyna - 14,5, bıdaı unyna - 12,9, makaron ónimderine - 10,7, shaıǵa - 10, nanǵa - 7,6, sút ónimderine - 7, kúrishke - 5,6, mal etine - 6,1, qus etine 1,1 paıyz qymbattady.

Elektr energııasymen jáne sýmen jabdyqtaýda býmen, ystyq sýmen jabdyqtaý qyzmetteriniń baǵasy - 16,2, elektr energııasy, ony taratý boıynsha qyzmetterdi qosa alǵanda - 12,7, sýdy bólý boıynsha qyzmetter 5,7 ósti.