2020 jyl ishinde Almaty turǵyndary 5 mıllıard kılovatt saǵat elektr energııasyn tutynǵan
ALMATY. QazAqparat - Almatyda kommýnaldyq qyzmetteri kúsheıtilgen rejımde jumys istep jatyr, dep habarlaıdy QazAqparat tilshisi.
Almatyda ınjenerlik jelileri men tirshilikti qamtamasyz etý obektilerinde birde-bir iri jáne ortasha apat bolǵan joq,
«Biz Jańa jyldy joǵary daıyndyq jaǵdaıynda ótkizdik. Almaty qalasynyń jylý-energetıkalyq kesheni men turǵyn úı-kommýnaldyq sharýashylyǵynyń jumysynda iri aqaýlar tirkelgen joq. Osy kúnderi sýmen jabdyqtaý jáne elektr jelilerinde bolǵan birneshe jergilikti sıpattaǵy tótenshe jaǵdaılar qysqa merzimde joıyldy», - dedi qalalyq Energııatıimdilik jáne ınfraqurylymdy damytý basqarmasynyń basshysy Aıdar Berkimbaev.
Onyń aıtýynsha, bul Almaty ákimi Baqytjan Saǵyntaevtyń tapsyrmasyna sáıkes júzege asyrylatyn otyn-energetıkalyq kesheniniń jáne turǵyn úı-kommýnaldyq sharýashylyǵynyń barlyq kásiporyndaryn jańa jyldyq merekelerge tyńǵylyqty daıyndaýdyń nátıjesi.
Táýlik boıy kezekshilik etetin jedel-profılaktıkalyq brıgadalarǵa jáne dıspetcherlik qyzmetterge erekshe nazar aýdaryldy. Olardyń kásibıliligi almatylyqtar men qala qonaqtarynyń jaılylyǵyn qamtamasyz etti.
Jalpy, 2020 jyl ishinde Almaty turǵyndary 5 mıllıard kılovatt saǵat elektr energııasyn, 1 625 mıllıon tekshe metr gaz, 145,5 mıllıon tekshe metr sýyq sý tutynsa, onyń 75,1 mıllıon tekshe metrin halyq tutynǵan. 7,9 mln gıgakalorııa jylý energııasyn tutynǵan. Onyń 5,5 mln-y (69,6%) «Almaty elektr stantsııalary» AQ-na, 30,4%-y «Almatyteplokommýnenergo» JShS-niń 84 qalalyq qazandyqtary arqyly berildi.
