«2020 jyl: el 95 paıyz qazaqsha sóıleı me?» - respýblıkalyq basylymdarǵa sholý
***
«Nartáýekel! «Qazaqmys» Gonkong qor bırjasyna baǵaly qaǵazdaryn saýadaǵa shyǵardy». «Egemen Qazaqstan» gazetiniń búgingi sanynda osyndaı taqyryppen maqala basyldy. Basylymnyń habarlaýynsha, bul atalmysh korporatsııanyń ekinshilik lıstıngisi. Mys óndirýshi jáne myspen qosyp túrli tabıǵı resýrstardy óndiretin kompanııalar toby osyǵan deıin de, anyǵyraǵy 2005 jyly Londondaǵy qor bırjasynda baǵaly qaǵazdaryn birinshi bolyp saýdalaǵan, qazir de Eýropadaǵy basty bırjalardaǵy saýsaqpen sanarlyq qazaqstandyq kompanııalar sanatynda. «Nege Gonkkong bırjasy? Birinshiden, «Qazaqmys» álemdegi eń iri mys tutynýshy bolyp tabylatyn Qytaı naryǵyna jaqyn ornalasqan. Shamamen mystyń 50 paıyzyn Qytaıdyń uzaq merzimdi tapsyrys berýshileri satyp alady. Sondyqtan da Aspanasty eli negizgi qarjy kózi bolyp otyr. Jáne «Qazaqmys» Qytaı damý bankimen 2011 jyldyń maýsymynda quny 1,5 mlrd. bolatyn Ózara kelisim týraly memorandýmǵa qol qoıǵan», - delingen maqalada.
***
«Aıqynnyń» búgingi nómirinde memlekettik tildiń tynysyn keńeıtip, mártebesin kóterýge arnalǵan baǵdarlamany egjeı-tegjeıli taldaıtyn «2020 jyl: el 95 paıyz qazaqsha sóıleı me?» degen taqyryppen maqala basyldy. Gazet maqalasy táýelsizdikke qol jetkizgen jıyrma jyldyń ishinde qazaq tili óz tuǵyryna qona almaǵandyǵyn jáne tildi damytý jónindegi jańa zańnyń, búgingi kúnniń talabyna saı baǵdarlamanyń qajet ekendigin jazady. Osy oraıda Prezıdent «Tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasyn» óz Jarlyǵymen bekitti. Ol boıynsha, memlekettik tildi meńgergen eresek turǵyndardyń úlesin 2014 jylǵa qaraı - 20, 2017 jylǵa qaraı - 80, 2020 jylǵa qaraı - 95 paıyzǵa jetkizý mejelenip otyr. Al memlekettik BAQ-taǵy qazaq tilindegi kontenttiń úlesin kem degende 2014 jylǵa qaraı - 53, 2017 jylǵa qaraı 60, 2020 jylǵa qaraı - 70 paıyzǵa deıin asyrý kózdelgen.
***
«Alash aınasy» basylymy «Qazaq ádebıeti» gazetiniń bas redaktory, jazýshy Jumabaı Shashtaıulymen bolǵan tushymdy suqbatty oqyrman nazaryna usynyp otyr.«Biz qandaı halyqpyz?» degende ulttyq ereksheligimiz kórinip turǵany durys bolar edi» degen taqyryppen berilgen maqalada jazýshy jeke shyǵarmashylyǵy men «Qazaq ádebıeti» gazetiniń ádebıettegi máselelerdi qanshalyqty qorǵaı alyp júrýi jóninde ǵana emes, táýelsizdik qundylyqtary, eldiń zııaly qaýymy, qazirgi ádebıet pen qazirgi qoǵam jaıynda tereń oılar tastaıdy. «Biz qıyn da buralań jolmen júrsek te, óz baǵytymyzdy taýyp kele jatqan memleketpiz. Eń bastysy, júregimizdegi sózimizdi óz únimizben aıta alamyz. Burynǵydaı «artyq-aýys sóılep qoıamyn-aý» dep qoryqpaımyz. Tý syrtymyzdan qadalǵan nazardan qutyldyq, qudaıǵa shúkir», - dep táý etedi jazýshy suqbatta.
***
«Kazahstanskaıa pravda» gazeti óziniń búgingi sanynda 2011 jyly Qazaqstannyń JOO-larynyń bas reıtıngisin jarııalady. Materıalda elimizdiń úzdik 62 JOO-nyń tizimi berilip otyr. Zertteý bilim berý salasynyń sapasyn qamtamasyz etý jónindegi táýelsiz NKAOKO agenttigimen shyǵarylǵan. Qazaqstandyq agenttik onyń negizgi kórsetkishterin shyǵarý barysynda akademııalyq kórsetkishterin taldap, sarapshylardyń jáne jumys berýshilerdiń baǵasyn negizge alǵan. Agenttik óziniń zertteýinde eldegi barlyq 134 azamattyq JOO-ny qamtyǵan.
