2019 jyly júrgiziletin halyq sanaǵynyń ereksheligi aıtyldy
«Qazaqstanda sanaq árbir on jylda ótetinin bilesizder. Bıyl eki óńirde: Aqmola oblysynyń Býrabaı aýdanynda jáne Shyǵys Qazaqstan oblysynyń Aıagóz aýdanynda halyq sanaǵy boıynsha pılottyq joba iske asyryldy», - deıdi Astana statıstıka departamentiniń dırektory Qundyzbek Ábdirásilov Ortalyq kommýnıkatsııalar qyzmetinde ótken baspasóz máslıhatynda.
Spıkerdiń aıtýynsha, 2019 jyldyń qarasha aıyna josparlanyp otyrǵan negizgi halyq sanaǵy erekshe bolmaq - bul joly oǵan tsıfrlyq aqparattyq ınnovatsııalyq tehnologııalar paıdalanylady.
Qundyzbek Ábdirásilov bıýdjettik uıymdardyń qyzmetkerleri halyq sanaǵyna jumyldyrylmaıtynyn jetkizdi. «Biz sanaq jumysyna eriktilerdi jáne «Nur Otan» partııasyn shaqyramyz. Qazaqstanda halyq sanaǵyn júrgizýge qatysamyn deýshilerge qashanda esik ashyq. Ol úshin 2019 jyly Astana qalasynyń Statıstıka departamentine júginý qajet», - dedi ol.
Astana statıstıka departamentiniń dırektory qazirgi kezde sanaqqa qatysýshylarǵa aqy tóleý máselesi qaralyp jatqanyn da aıtty.
Eske sala keteıik, sońǵy ret Qazaqstanda halyq sanaǵy 2009 jyly júrgizilgen bolatyn.