2019 jyly tabıǵatty qorǵaý zańnamasyn buzǵandarǵa 77 mln teńge aıyppul salyndy
«2019 jyldyń basynan beri komıtettiń aýmaqtyq bólimsheleri 7 421 reıd jáne 871 tekserý júrgizdi. Nátıjesinde 7 313 tabıǵatty qorǵaý zańnamasyn buzý faktisi anyqtalǵan. Onyń ishinde ańshylyq boıynsha – 745, orman tártibin buzý boıynsha – 1 024, balyq boıynsha – 5 544 zańbuzýshylyq tirkelgen. 5 921 adam ákimshilik jaýapkershilikke, 48 adam – qylmystyq jaýapkershilikke tartyldy», - dedi Orman sharýashylyǵy jáne janýarlar dúnıesi komıtetiniń tóraǵasy Ashat Qaınarbekov elordada ótken baspasóz máslıhatynda.
Onyń aıtýynsha, zań buzýshylarǵa jalpy somasy 77,7 mln teńgege ákimshilik aıyppul salynyp, onyń 69,1 mln teńgesi óndirilgen.
Eske sala ketsek, 25 qazanda Qyzylorda oblysy Jalaǵash aýdanynda brakonerdi qýǵan qoryqshy Ádil Kenjeǵulov mert boldy. Ol – jyl basynan beri tabıǵatty qorǵaýda qaza tapqan úshinshi ınspektor.
Sonymen birge, QR Ekologııa, geologııa jáne tabıǵı resýrstar mınıstrligi tabıǵatty qorǵaý ınspektorlarynyń qarý qoldaný quzyretin ózgertýdi jáne zamanaýı quraldarmen jańasha jabdyqtaýdy usynyp otyr.