2019 jyly sýbsıdııalanatyn áýe baǵyttary boıynsha konkýrstyń qorytyndysy shyqty
ASTANA. QazAqparat - Indýstrııa jáne ınfraqurylymdyq damý mınıstrliginiń Azamattyq avıatsııa komıteti sýbsıdııalanatyn áýe baǵyttary boıynsha bıylǵy konkýrstyń qorytyndysyn jarııalady, dep habarlaıdy QazAqparat tilshisi komıtettiń baspasóz qyzmetine silteme jasap.
Halyqtyń áýe tasymalyna qajettiligin ishki baǵyttarda qanaǵattandyrý úshin elimizde 2002 jyldan bastap áýe baǵyttaryna sýbsıdııa bólinedi. Sýbsıdııalaýdyń negizgi maqsaty - Qazaqstan Respýblıkasynyń oblys ortalyqtary arasyndaǵy áýe qatynasyn qamtamasyz etý, sondaı-aq Qazaqstan aýmaǵynda týrıstik baǵyttardy damytý.
«Osylaısha, Qazaqstan Respýblıkasy Úkimetiniń 2013 jylǵy 31 qańtardaǵy №69 qaýlysymen bekitilgenindeı, sýbsıdııalanǵan áýe baǵdarlaryna arnalǵan konkýrs erejesine sáıkes, Qazaqstan Respýblıkasynyń Indýstrııa jáne ınfraqurylymdyq damý mınıstrliginiń Azamattyq avıatsııa komıteti jyl saıyn sýbsıdııalanatyn áýe baǵyttaryna konkýrs ótkizedi», - delingen komıtettiń habarlamasynda.
Konkýrs komıssııasynyń sheshimi boıynsha SCAT áýe kompanııasy mynadaı sýbsıdııalanǵan áýe baǵyttary boıynsha jeńimpaz dep tanylǵan:
Qyzylorda - Qaraǵandy - Qyzylorda arasynda aptasyna keminde eki ret (tarıf 18 myń teńge), Óskemen - Qaraǵandy - Óskemen baǵyty (tarıfi 20 000 teńge), Shymkent - Petropavl - Shymkent aptasyna keminde 2 ret (tarıfi 20 000 teńge), Astana - Úsharal - Astana baǵyty boıynsha aptasyna keminde 6 ret (tarıf 16 000 teńge), Kókshetaý-Aqtaý-Kókshetaý baǵyty boıynsha aptasyna keminde 2 ret (tarıf 20 000 teńge), Kókshetaý - Almaty-Kókshetaý (18 000 teńge), Petropavl - Astana - Petropavl aǵyty boıynsha aptasyna keminde 2 (tarıf 10 0 00 teńge), Petropavl - Almaty - Petropavl baǵyty (20 000 teńge), Taldyqorǵan - Astana - Taldyqorǵan baǵyty boıynsha aptasyna 7 ret (24 500 teńge), Úsharal - Almaty - Úsharal baǵyty boıynsha baǵdarlar (10 000 teńge).
Al «Ońtústik aspan» AQ áýe kompanııasy mynadaı baǵyttar boıynsha jeńimpaz atanǵan:
Almaty - Balqash - Almaty (bir baǵytta 14 000 teńge), Astana - Úrjar - Astana (16 000 teńge), Úrjar - Almaty - Úrjar baǵdary boıynsha aptasyna keminde 4 ret (14 000 teńge), Astana - Balqash - Astana baǵyty boıynsha aptasyna keminde 5 ret (tarıf 9000 teńge), Óskemen-Semeı-Úrjar-Semeı-Óskemen baǵyty boıynsha aptasyna keminde 2 ret (bul jerde Óskemen-Semeı baǵyty 4 000 teńge, Óskemen - Úrjar baǵyty 10 000 teńge, Semeı-Úrjar baǵyty 10 000 teńge, Zaısan-Óskemen aptasyna keminde 2 ret (bir baǵytta 8 000 teńge).
Eske sala ketsek, Azamattyq avıatsııa komıteti Qazaqstannyń týrıstik aımaqtaryna qatynaıtyn áýe baǵyttaryn sýbsıdııalaýǵa konkýrsty ótken aıdyń basynda jarııalaǵan edi.
