2019 jyly soltústik óńirlerge 2,5 myń otbasy qonys aýdardy

NUR-SULTAN. QazAqparat – 2019 jyly Qazaqstannyń ońtústiginen soltústik óńirlerge 2,5 myń otbasy qonys aýdardy. Bul týraly QR Eńbek jáne halyqty áleýmettik qorǵaý birinshi vıtse-mınıstri Erjan Jylqybaev málim etti, dep habarlaıdy QazAqparat tilshisi.

«Memlekettik baǵdarlama aıasynda eńbek kúshi artyq ońtústik óńirlerden jumys kúshi tapshy soltústik aýmaqtarǵa qonys aýdarý qarastyrylǵan. Ótken jyly 2,5 myń otbasy qonys aýdardy, bul shamamen 10 myń adamǵa jýyq. Qonys aýdarǵandardyń ishinen 3,5 myń adam nemese eńbekke qabiletti jastaǵy qatysýshylardyń 79 paıyzy jumysqa ornalastyryldy», – dedi birinshi vıtse-mınıstr Ortalyq kommýnıkatsııalar qyzmetinde.

Onyń sózine qaraǵanda, Nur-Sultan qalasynan Ekibastuzǵa 242 otbasy baryp, olar bes jylǵa arendalyq baspanamen qamtamasyz etildi. Memlekettik baǵdarlama aıasynda Soltústik Qazaqstan oblysynda 428 úıdiń qurylysyna 3 mlrd teńge bólindi.

Ol eńbek resýrstarynyń utqyrlyǵyn yntalandyrý úshin qonys aýdarý kezinde otbasynyń árbir múshesine 93 myń teńge (35 AEK) mólsherinde sýbsıdııa, sondaı-aq turǵyn úıdi jalǵa alýǵa jáne kommýnaldyq qyzmetterdiń aqysyn tóleýge 12 aı ishinde sýbsıdııa beriletinin eske saldy.

Aıta keteıik, búgingi brıfıngte QR Eńbek jáne halyqty áleýmettik qorǵaý mınıstrligi 2019 jylda nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasyn júzege asyrýdyń qorytyndysyn jarııalady.