2019 jyly ShYU Bas hatshysy mıssııasy Ózbekstan ókiline ótedi
«Sońǵy úsh jyldyń ishinde uıymnyń ómirinde birqatar mańyzdy oqıǵalar boldy, solardyń biri - Úndistan men Pákistandy ShYU-nyń tolyqqandy múshe memleketteri retinde qabyldaý. «Shanhaı rýhy» energııasy qosymsha údetilip, ShYU-nyń jańa tıptegi halyqaralyq uıym retindegi baı áleýeti jańa kúshke ıe boldy. «Shanhaı segizdiginiń» qurylymdyq kún tártibi birqatar jasampaz bastamalarǵa uıytqy boldy. Qaýipsizdik salasynda ózara árekettestik nyǵaıyp, ekonomıka, saýda, mádenıet jáne sport, ǵylym jáne bilim salasynda yntymaqtastyq nyǵaıdy, áıelder jáne jastar qozǵalysy jańa serpinge ıe boldy», - dedi R.Alımov óz mıssııasynyń aıaqtalýyna oraı ótken arnaıy qabyldaý kezinde.
Onyń aıtýynsha, ShYU-nyń kóppolıarly álemdi qalyptastyrý protsesiniń belsendi qatysýshysy retinde suranysy ósti. Endi qaýipsizdik pen yntymaqtastyqtyń tıimdi jahandyq jáne aımaqtyq sáýletin qurýdy ShYU-nyń qatysýynsyz elestetý óte qıyn.
«Eń bastysy - ShYU maqsattary ǵalamshardaǵy mıllıondaǵan adamdarǵa jaqyn ári túsinikti. Úsh jyl boıy memleket basshylarynyń ShYU-yn damytý boıynsha kólemdi jobalaryn iske asyrýǵa atsalysý maǵan úlken jaýapkershilik júktedi. Bul jumysta men qashanda ShYU Hatshylyǵyndaǵy áriptesterime, ShYU elderiniń tatý «otbasyndaǵy» júzdegen jáne myńdaǵan adamdardyń qoldaýyna súıenetinmin», - dep málimdedi ShYU-nyń Bas hatshysy.
ShYU Bas hatshysy, tájikstandyq R.Alımovtyń ókilettigi 2018 jyldyń 31 jeltoqsanynda aıaqtalady. 2019 jyldyń 1 qańtarynan bastap 2021 jyldyń sońyna deıin ShYU-nyń Bas hatshysy Ózbekstan ókili Vladımır Norov bolady.
Avtor: Sadyq Ákejanov
