2019 jyly shegirtke qaı aýmaqtarda taralýy yqtımal
ASTANA. QazAqparat - Búgin Parlament Májilisinde QR AShM Agroónerkásiptik keshendegi memlekettik ınspektsııa komıtetiniń tóraǵasy Ajar Qadjybekova el aýmaǵyndaǵy egistiktikterde shegirtkeniń taralýyna qatysty jaǵdaıǵa túsinik berdi, dep habarlaıdy QazAqparat.
«Aǵymdaǵy jyly zııandy jáne asa qaýipti zııandy organızmder men karantındik obektilerdiń 5,1 mln gektarǵa, onyń ishinde 1,92 mln gektarǵa úıirli shegirtke tektes zııankesterdiń, 2,4 mln gektarǵa astyq daqyldary aýrýlarynyń, 444 myń gektarǵa saıaq shegirtke tektesterdiń taralýy boljandy. Respýblıkalyq bıýdjetten asa qaýipti zııandy organızmder men karantındik obektilerge qarsy 2,8 mln gektar jerde qorǵaý is-sharalaryn júrgizýge 3,57 mlrd teńge bólindi. Degenmen bul qorǵaý is-sharalarymen tolyq qamtýdy qamtamasyz etýge jetkiliksiz», - dep toqtaldy A. Qadjybekova.
Onyń sózine qaraǵanda, zertteý sharalaryn júrgizý kezinde 492 anyqtaýshy-maman jáne 432 avtokólik jumyldyryldy. Úıirli shegirtkelerge qarsy óńdeý jumystary 1,7 mln gektar aýmaqqa, onyń ishinde ıtalıandyq prýsqa qarsy - 929,1 myń gektar, azııalyq shegirtkege qarsy - 201,5 myń gektar, sondaı-aq marokkolyq shegirtkege qarsy 569,5 myń gektar aýmaqqa júrgizildi.
«Aýyl sharýashylyǵy jerleriniń shegirtkelermen zaqymdaný faktileri tirkelmedi. Sonymen qatar, 2018 jyly astyq daqyldarynyń aýrýlaryna qarsy kúres júrgizýge respýblıkalyq bıýdjet esebinen 543,9 myń gektar aýmaqqa fýngıtsıdter alyndy», - dep naqtylady komıtet basshysy.
Onyń aıtýynsha, 2019 jyly asa qaýipti zııandy organızmderdiń taralýy 4,9 mln gektarǵa, onyń ishinde astyq daqyldarynyń aýrýlary - 2,4 mln gektarǵa, úıirli shegirtkeler -1,9 mln gektarǵa jáne astyqtyń sur kóbelegi 549,2 myń gektarǵa taralýy boljandy, dep toqtaldy A. Qadjybekova veterınarııalyq jáne fıtosanıtarııalyq qaýipsizdik máselelerine arnalǵan dóńgelek ústel otyrysynda.
