2019 jyly Şýchınsk-Zerendi tas joly paıdalanýǵa beriledi
Jol jobasy úsh lotqa bólingen: «0-30 shaqyrym», «30-47 shaqyrym» jáne «47-80 shaqyrym, al, onyń jalpy uzyndyǵy ‒ 80 shaqyrym. Eni 3,5 metr jáne eki qozǵalys jolaǵynan turatyn tas jol ІІ jáne ІІІ sanatqa jatady. Qozǵalystyń eseptik jyldamdyǵy - 100 shaqyrym/saǵ. Jobanyń jalpy quny - 15,3 mlrd teńge, 2017 jyldyń jumys qorytyndysy boıynsha 7 mlrd qarjy ıgerilse, al bıyl jol qurylysyna 3,3 mlrd teńge jumsaldy. Atalǵan tasjol qurylysynyń bas merdigeri - BI GROUP kompanııasyna qarasty «Kazahdostroı» JShS.
«Qaıta jóndeý jumystarynyń maqsaty - eki kýrorttyq aımaqtyń ózara baılanysyn jańartý jáne jaqyndatý. Qazir jol Kókshetaý arqyly ótedi, bul 50 shaqyrym. Jańa jol qashyqtyq pen ýaqytty aıtarlyqtaı qysqartady. Ólke egisti alqap bolǵandyqtan, joba jergilikti sharýalardyń tilekterin eskere otyryp ázirlendi. Uzyndyǵy 80 shaqyrymdy quraıtyn tas jol boıynda 63 sý ótkizetin qubyr, 2 demalys alańy men 4 avtobýs pavılony, odan bólek 15 shaqyrym qardy ustaıtyn jáne 14 shaqyrym barerlik qorshaý qarastyrylǵan. Atalǵan tas jol Zlatopole, Savınka, Vedenovka, M.Ǵabdýllın, Serafımovka jáne taǵy basqa eldi mekenderdiń ústinen ótedi», - dedi «Kazavtojol» AQ Aqmola oblystyq fılıaly dırektorynyń orynbasary Amangeldi Birimjanov baspasóz týry barysynda.
Jol qurylysy alańynda 784 adam jáne 278 tehnıka jumys isteýde. 2017 jyldyń tamyzynda bastalǵan «Şýchınsk-Zerendi» tas joly 2019 jyldyń mamyr aıynda paıdalanýǵa beriledi.
«Jumysymyzdyń basty qıyndyǵy ‒ aýa raıy, jańbyrdyń ózinen ár aı saıyn 10 jumys kúnin joǵaltamyz. Jumystardy tabysty júrgizýge bizdiń qolymyzda bar progressıvti tehnologııalyq sheshimder yqpal etedi. Eń aldymen, bul Trimble kompanııasynan 3D-nıvelırleý júıesi. Ol óndiristi jeńildetedi jáne jedeldetedi. Bul rette ýaqyt pen materıaldy, onyń ishinde janar maıdy da únemdeıdi. Tehnıkanyń jumys kúshin tıimdi qoldaný jumys tıimdiligin 25%-ǵa ósirdi Sonymen qatar, bizde joǵary tehnologııalyq zerthana, GPS-trekıng júıesi jáne jyljymaly usaqtaý-suryptaý qondyrǵylary bar. Sondaı-aq, biz Lean quraldaryn belsendi qoldanamyz. Mysaly, asfaltbetondy zaýyttardy karerlerge jaqyn ornalastyra otyryp, biz materıaldy tasymaldaý ýaqytyn aıtarlyqtaı qysqarttyq», - dedi BI GROUP kompanııasyna qarasty «Kazahdostroı» JShS Şýchınsk fılıalynyń dırektory Tólegen Bereketov.
Onyń aıtýynsha, tas joldyń barlyq úsh loty boıynsha tómengi (grýntty-mıneraldyq qospa), joǵarǵy (organıkalyq-mıneraldyq qospa) jáne negizgi qabatynda iri túıirshikti asfaltobetondy tóseý jumystary júrgizildi.
«Kazavtojol» AQ-nyń málimetine sáıkes, bıyl elimiz boıynsha jalpy uzyndyǵy 473 shaqyrymdy quraıtyn tas jol paıdalanýǵa beriledi, onyń ishinde Pavlodar-Kalabataý- 159 sh\m, Astana-Pavlodar-80 sh\m, Oral-Kamenka (Reseı)-73 sh\m, Aqtaý-Beıneý- 73 shaqyrym jáne taǵy basqa respýblıkalyq mańyzy bar joldar.
Eske salsaq, buǵan deıin osy jyldyń sońyna deıin «Ortalyq-Shyǵys» dálizi boıynsha Astana-Pavlodar jáne Pavlodar-Semeı baǵyttary boıynsha tas joldyń paıdalanýǵa beriletinin aıtqan bolatynbyz.
