2019 jyly Sankt-Peterbýrg pen Chelıabınsk oblysynda Astana kúnderi ótedi
ASTANA. QazAqparat - Astana ákimi Baqyt Sultanov jáne Reseıdiń Qazaqstandaǵy Tótenshe jáne Ókiletti elshisi Alekseı Borodavkın 2019 jylǵa josparlanǵan Sankt-Peterbýrg pen Chelıabınsk oblysynda ótetin Astana kúnderin talqylady, dep habarlaıdy ákimdiktiń baspasóz qyzmeti.
Búgin Astana ákimdiginde qala ákiminiń Reseıdiń Qazaqstandaǵy Tótenshe jáne Ókiletti elshisimen kezdesýi bolyp ótti.
Taraptar Astana jáne Máskeý qalalarynyń úkimeti arasyndaǵy 2018 jyldyń jeltoqsanynda aıaqtalatyn eki jyldyq áriptestik baǵdarlamasynyń iske asyrylý qorytyndysyn aldyn ala talqylady.
Borodavkın myrza Reseıdiń tarapynan eki astananyń «júıeli jáne josparly áriptestiktiń» jalǵasýyna múddeli ekendigin, taıaý jyldarǵa ózara birlesip jumys isteıtin jańa baǵdarlama ázirleýdi usyndy.
«Elshilik Astana men Máskeýdiń arasyndaǵy dostyq baılanysty damytyp jáne nyǵaıtýǵa bar kúshin salady», - dep ýáde berdi Reseıdiń Qazaqstandaǵy Tótenshe jáne Ókiletti elshisi.
Baqyt Sultanov elshi myrzanyń usynysyn qoldady.
«Memleket basshysynyń tapsyrmasymen biz Astanany 2050 jylǵa deıin damytý Strategııasyn ázirleýge kiristik, - dedi qala ákimi. - Osy strategııany iske asyrý sheńberinde biz álemniń túrli qalalarynyń halyqaralyq ýrbanıstıkalyq damý tájirıbesin zertteımiz. Bizge iri megapolıs retinde Máskeýdiń tájirıbesi óte qyzyqty».
Ákim sondaı-aq zamanaýı álemde básekeles elder ǵana emes, qalalardyń da básekelesip jatqan tendentsııasynyń baıqalatynyn aıta ketti.
«Bul jerde tek báseke týraly emes, ózara eki jaqqa da tıimdi kooperatsııa bar», - dedi.
