2019 jyly memlekettik satyp alýda rekordtyq únem boldy

NUR-SULTAN. QazAqparat - 2019 jyly memlekettik satyp alý tarıhynda rekordtyq únem boldy. Bul týraly búgin Májiliste «Memlekettik satyp alý máseleleri boıynsha keıbir zańnamalyq aktilerine tolyqtyrýlar men ózgerister engizý týraly» zań jobasynyń tanystyrylymynda QR Qarjy vıtse-mınıstri Rýslan Beketaev aıtty, dep habarlaıdy QazAqparat tilshisi.

«2018 jylǵy 26 jeltoqsandaǵy Zańmen qabyldanǵan ózgeristerdi eskere otyryp, «Memlekettik satyp alý týraly» Zańnyń oryndalý barysy týraly qysqasha aıtyp berýge ruqsat etińizder. Birinshiden - bul ótkizilmegen konkýrstar boıynsha bir kózden satyp alýǵa tyıym salý. Nátıjesinde bir kózden satyp alýdyń jalpy úlesi 2018 jyly 72 paıyzdan 2019 jyly 49 paıyzǵa deıin, al básekelestik satyp alý boıynsha tıisinshe 51 paıyzdan 13 paıyzǵa deıin aıtarlyqtaı qysqardy«, - dedi vıtse-mınıstr.

Sondaı-aq onyń dereginshe, 2019 jyly memlekettik satyp alý tarıhynda memlekettik satyp alý qorytyndysy boıynsha 361 mlrd teńge únemdeldi.

»Bul rette sońǵy 3 jylda únemdeýdiń jalpy somasy 1 trln teńge boldy«, - dedi Rýslan Beketaev.

Aıta keteıik, Qarjy mınıstrligi usynǵan derekterge sáıkes, memlekettik satyp alý barysynda 2016 jyly 173 mlrd, 2017 jyly 250 mlrd, 2018 jyly 311 mlrd jáne 2019 jyly 361 mlrd teńge únemdelgen.