2019 jyly medıtsınalyq saqtandyrý jarnasyn tóleý tártibi ózgere me
ASTANA. QazAqparat - 2019 jyly mindetti áleýmettik medıtsınalyq saqtandyrý jarnasyn tóleý tártibi de, jarna mólsheri de ózgermeıdi. Bul týraly «Áleýmettik medıtsınalyq saqtandyrý qory» KEAQ Almaty qalalyq fılıaly dırektory Tileýhan Ábildaev habarlady.
«Qazir jarnany jumys berýshiler ǵana tólep jatyr. Olar keler jyly da jumysker tabysynyń 1,5 paıyzy kóleminde aýdarym jasaıdy. Al, jeke kásipkerler ózi úshin jarna aýdarý mindetinen 2018 jyly bosatylǵan bolatyn. Biraq olar jumys berýshi retinde qaramaǵyndaǵy jumysshylary úshin aýdarym jasaýǵa mindetti», - deıdi ol.
Aıtýynsha, jumys berýshi jarnany jumysker jalaqysynan emes, óz qaltasynan tóleýi tıis.
Esterińizge sala ketsek, Parlament jaqynda 2019 jyldyń 1 qańtarynan bastap biryńǵaı jıyntyq tólem engizetin zańdy qabyldaǵan bolatyn. Atalǵan tólemge mindetti áleýmettik medıtsınalyq saqtandyrý jarnasy da engizilgen. Bul ózin-ózi jumyspen qamtyǵan azamattarǵa saqtandyrý júıesine qatysýǵa múmkindik beredi.
Qalǵan sanattaǵy azamattar mindetti medıtsınalyq saqtandyrý jarnasyn 2020 jyldan bastap tóleıdi. Atap aıtar bolsaq, jumyskerler tabysynyń 1 paıyzyn Medıtsınalyq saqtandyrý qoryna aýdarady. Azamattyq-quqyqtyq kelisimshart negizinde eńbek etetinder de aı saıynǵy tabysynyń 1 paıyzyn qorǵa aýdaryp otyrýǵa mindetti. Sonymen qatar, 2020 jyldan bastap memleket te jarna aýdarýǵa kirisedi. Jalpy alǵanda, 14 sanatqa jatatyn 10 mıllıonǵa jýyq adam bıýdjet esebinen qarjylandyrylady.
Mindetti saqtandyrý sheńberinde medıtsınalyq kómek 2020 jyldan bastap kórsetile bastamaq. Oǵan deıin jınaqtalǵan qarajat Ulttyq bankte saqtalyp, 2020 jyly saqtandyrý paketi boıynsha kórsetilgen qyzmet aqysyn tóleýge jumsalady.
