2019 jyly qyzylordalyqtardy eleń etkizgen jańalyqtar qandaı
Qyzylorda oblysy ákimi qyzmetin alty jyldan astam ýaqyt atqarǵan Qyrymbek Kósherbaev byltyr basqa qyzmetke aýysyp, ornyna Qýanyshbek Ysqaqov taǵaıyndaldy. Aıta keterligi, sońǵy alty jylda Syr óńirinde kóptegen tyń jobalar qolǵa alyndy. Oblys ortalyǵynda kóp qabatty úıler boı kóterip, jańadan kóptegen shaǵyn aýdandar paıda boldy. Investıtsııa tartý isi jaqsaryp, aımaqta aýqymdy jobalar júzege asty. Mádenıet jáne sport salasynda da tolaǵaı tabystarǵa múmkindik týdy.
Byltyr Syr sporty úshin tabysty jyldyń biri boldy. Mánerlep syrǵanaýdan Elızabet Tursynbaeva Japonııanyń Saıtama qalasynda ótken álem chempıonatynda kúmis júldege qol sozdy. Bul tolaǵaı tabys mánerlep syrǵanaý sportynan qazaq qyzdarynyń arasynda qol jetken zor jetistik sanalady. Sondaı-aq, jergilikti boksshylar qatarynan Qamshybek Qońqabaev pen Tursynbaı Qulahmet álem jáne Azııa chempıonattarynan júldeli oraldy. Qamshybek eki jarysta da kúmis medal alsa, Tursynbaı Azııadan altyn, dúnıejúzilik dodadan qola medal alyp qaıtty. Jergilikti jankúıerlerdiń esinde qalǵan erekshe taǵy bir jaǵdaı – fýtboldan Qyzylordanyń «Qaısary» araǵa jıyrma jyl salyp Qazaqstan kýbogyn tóbesine kóterip, bıyl eýrokýbok oıyndarynda tusaýkeser matchyn ótkizýge múmkindik aldy.
Syr óńiriniń óner salasynda da ıgilikti isterge jol ashyldy. Qazaqstan Respýblıkasy Úkimetiniń 2019 jylǵy 24 qazandaǵy №800 qaýlysymen Nartaı Bekejanov atyndaǵy akademııalyq mártebesi berildi. Bul jańalyq - Syr eli mádenıeti men óneriniń deńgeıi men sala mamandarynyń tynymsyz eńbekteriniń jemisi. Elimizde mundaı óner ordalarynyń sany kóp emes. Nartaı Bekejanov atyndaǵy teatr irgesi 1955 jyly Almaty oblysy Eńbekshiqazaq jáne Qaratal aýdandaryndaǵy jergilikti teatry negizinde uıymdastyrylǵan. 1960 jyly teatr Qyzylorda qalasyna kóshirildi. 1970 jyly Nartaı Bekejanovtyń esimi berildi.
Iranda «Qorqyt ata» kitabynyń jańa nusqasy tabyldy. Bul jóninde Syr óńirinde ótken túrkitildes elderdiń «Qorqyt jáne Uly dala sazy» óner festıvaline kelgen ırandyq kollektsıoner Velı Mýhammed Hodja málim etti. Búgingi kúnge deıin darhan dalanyń ulylyǵyn dáriptegen jaýhar jyrdyń eki nusqasy bizge belgili. «Qorqyt Ata kitabynyń» Drezden jáne Vatıkan qalalarynda saqtalǵan eki qoljazbasy bar. Birinshi nusqada - 12, ekinshisinde - 6 dastan jazylǵany burynnan málim.
Qyzylorda oblysy Qazaly aýdanynda Syrdarııa ózeniniń ústinen ótetin uzyndyǵy 219 metrdi quraıtyn kópir ashyldy. Bul kópir kóptegen eldi mekender arasyn jalǵastyrady. Ol uzaq jyldan beri túıindi problemanyń biri bolatyn, dep habarlaıdy QazAqparat tilshisi. Kópir Álseıit ýchaskesinde Syrdarııa ózeni arqyly ótedi. Temir-beton arqyly jasalǵan kópir 2 jolaqtan turady. Jalpy uzyndyǵy - 219, eni 12 metrdi quraıdy. Aıta keterligi, atalmysh kópir endi Qazaly aýdanyndaǵy - 7, Aral aýdanyndaǵy 6 eldi mekendi Qazaly aýdanynyń ortalyǵy - Áıteke bı kentimen jalǵastyrady. Burynǵy jyldarda atalmysh orynda qalqymaly kópir halyqqa qyzmet kórsetetin. Qys mezgilinde darııa boıynda muzdyń ustasýyna baılanysty jylma-jyl halyqtyń qatynasy úzilip qalatyn. Jańa kópir osylaısha qanshama halyqtyń qýanyshyna aınaldy.
Byltyr Syr óńirindegi órkendi ózgerister osyndaı óreli istermen órnekteldi. El mereıin ósirgen bul jetistikter aımaqtyń ajaryn aıshyqtap, aldaǵy kúnderge negiz qalady. Mundaı jarqyn jobalar, baıypty bastamalar, izgilikti ister laıyqty jalǵasyn tabatynyna senim mol.
foto: www.mfa.kz