2019 jyly elordada tórt balabaqsha paıdalanýǵa beriledi
ASTANA. QazAqparat - 2018 jyldyń 6 aıynda elorda balabaqshalaryna 23 myń joldama elektrondy túrde berildi. Bul týraly búgin Astana qalalyq bilim basqarmasynyń basshysy Ánýar Janǵozın aıtty, dep habarlaıdy QazAqparat tilshisi.
«Búgingi tańda Astana qalasynyń ákimdigi tarapynan bilim salasyna jan-jaqty qoldaý kórsetilip otyr. Birinshi kezekte qala ákimi Áset Isekeshevtiń arqasynda elordalyq bilim berý júıesin qarjylandyrý sońǵy 2 jylda qarqyndy ósýde. Ol 2017 jyly 54 mlrd teńgeni qurasa, bıyl 65 mlrd teńgege, ıaǵnı 20 paıyzǵa artty. Onyń ishinde basymdyq berilgen baǵyttar - bilim berý nysandaryn qajetti deńgeıde qamtamasyz etý, jóndeý jumystary, qosymsha bilim berý júıesi jáne basqalalary», - dedi ol.
Basqarma basshysynyń aıtýynsha, búgingi tańda qalada 336 mektepke deıingi bilim berý uıymy jumys isteıdi. Jyl saıyn mundaı mekemeler sany arta túsýde. Nátıjesinde sońǵy 2 jyldyń ishinde 3-6 jas aralaǵyndaǵy balalardy mektepke deıingi daıarlyqpen qatmamasyz etý kórsetkishi 70 paıyzdan 81 paıyzǵa deıin ósti. Qalǵan balalardyń 30 paıyzy jekemenshik balabaqshalar arqyly qamtylǵan. Mektepke deıingi jekemenshik uıymdarda 18 myń orynǵa memlekettik bilim berý tapsyrysy ornalastyrylǵan. Kóktemdegi balabaqshaǵa irikteýdiń nátıjesinde 3 pen 6 jas aralyǵyndaǵy kezekte turǵan balalar sany 37 myńnan 24 myń balaǵa deıin tómendedi.
«Sońǵy eki jylda e-astana arqyly balabaqshalarǵa 43 myńnan astam joldama berildi. Onyń 23 myńy 2018 jyldyń І jartyjyldyq kórsetkishi. ıAǵnı, jyl saıyn júıeni qoldana biletin ata-analar sany kóbeıýde. Ótken jylda biz 20 myń joldama bersek, osy jyly bul kórsetkish tek jarty jyl ishinde artyp otyr»,- dedi Ánýar Janǵozın.
Onyń dereginshe, 2018 jyly qalada 480 orynǵa arnalǵan №94 Suńqar jáne №95 Almaty memlekettik balabaqshalary ashyldy. Sonymen qatar búginde memlekettik-jekemenshik áriptestik aıasynda 720 orynǵa arnalǵan eki balabaqsha salynyp jatyr. Munan bólek, ulttyq kompanııalar tarapynan 480 oryndyq 2 balabaqshanyń qurylysy júrgizilýde. Bul nysandardyń barlyǵy 2019 jyldyń ishinde paıdalanýǵa beriledi.
