2019 jyly eldegi óńirlik jáne etnomádenı birlestikter akkredıtteýden ótedi
Іs-sharaǵa QR Parlamenti Májilisiniń depýtattary, Almaty qalalyq máslıhatynyń depýtattary, Almaty qalasy ákimdiginiń ókilderi, respýblıkalyq etnomádenı birlestikterdiń basshylary, qalalyq etnomádenı birlestikter men QHA qurylymdarynyń basshylary, jurtshylyq ókilderi men BAQ qatysty.
Sarapshylar «Qazaqstan halqy Assambleıasy týraly» QR Zańyn iske asyrý máseleleri, 2019 jylǵa arnalǵan jumys josparlary men mindetterin talqylady.
Janseıit Túımebaev taıaý bolashaqta birlese atqarylatyn mindetterdi aıqyndaýdaǵy, Assambleıanyń aldaǵy sessııasyn ótkizýge kúsh-jiger jumyldyrýdaǵy, «Qazaqstan halqy Assambleıasy týraly» QR Zańyn, «Rýhanı jańǵyrý» baǵdarlamasyn iske asyrýdaǵy bul kezdesýdiń mánin atap kórsetti.
«Etnomádenı birlestikter Qazaqstannyń mádenı-tildik baılyǵyn saqtaı otyryp, ózderiniń Qazaqstan halqyn biriktirý jónindegi qoǵamdyq rólin oryndaýlary kerek. Sizderdiń qurylymdar azamattyq qoǵamnyń qýatty ınstıtýttaryna aınalýlary kerek. Bul úshin etnostardy jalpymemlekettik mindetterdi sheshýge keńinen tartýdy qamtamasyz ete otyryp, olarmen udaıy jumys isteý qajet. 2018 jyly sáýirde QHA týraly zańǵa ózgeris engizildi. Zańda etnomádenı birlestikterdi qoǵamdyq akkredıtteýden ótkizetin ınstıtýt týraly, qoǵamdyq tirkeý erejeleri kórsetildi. Bıyl jyl basynda óńirlik, al jyl ortasynda respýblıkalyq birlestikter akkredıtteýden ótetin bolady», - dedi QHA Tóraǵasynyń orynbasary.
Sondaı-aq ol etnomádenı birlestikter belsendilerimen taıaý aradaǵy bolashaqta birlese atqarylar qyzmettiń basym baǵyttaryn ózi qalaı túsinetini týraly oılarymen bólisti.
Atap aıtqanda, Janseıit Túımebaev respýblıkalyq etnomádenı birlestikterge óz etnostary arasynda júrgiziletin jumysty jandandyrý qajettigin eskertti.
J.Túımebaev QHA-nyń barlyq qurylymdarynyń qyzmetine qatysýdy keńeıtýdiń mańyzyn, ózderi shyqqan eldermen halyqtyq dıplomatııany damytýdyń, sonyń ishinde tehnologııalar transferi, ınvestıtsııalardy tartý múmkindikterin paıdalaný, memlekettik tildi úırenýge basym kóńil bólýdiń qajettigin atap kórsetti.
Respýblıkalyq etnomádenı birlestikterdiń qyzmeti týraly Qazaqstan Respýblıkasy Parlamenti Májilisiniń depýtaty, «Qazaqstan uıǵyrlarynyń respýblıkalyq mádenı ortalyǵy» QB tóraǵasy Shaımardan Nurymov, «Mıtsva» Qazaqstannyń evreıler qaýymdastyǵynyń tóraǵasy Aleksandr Baron, «Qazaqstan ázerbaıjandarynyń qaýymdastyǵy» respýblıkalyq QB tóraǵasy Abılfas Hamedov, «Belarýs mádenı ortalyǵy» QB tóraǵasy Leonıd Pıtalenko aıtyp berdi.
