2019 jyly dári-dármekterdiń baǵasy birkelki bolmaq
«Qazaqstanda dárilik zattar men medıtsınalyq maqsattaǵy buıymdardyń baǵalary men aınalymyn retteýdiń jańa úlgisi engizý týraly zań qazirde Senat qaraýynda. Zańnama boıynsha dárilerge elimizdiń barlyq terrıtorııasynda birkelki baǵa engiziledi. Dári-dármektiń baǵalary Densaýlyq saqtaý mınıstriniń buıryǵymen bekitiledi. Atalǵan buıryq pen dári-dármek baǵalary týraly aqparat mınıstrlik pen oǵan qarasty uıymdardyń saıttarynda qoljetimdi bolady», - dedi QR Densaýlyq mınıstrligi Farmatsııa komıtetiniń tóraıymy Lıýdmıla Bıýrabekova OKQ-de ótken baspasóz máslıhatynda.
Onyń aıtýynsha, búginde mınıstrlikke qarasty Ulttyq saraptaý ortalyǵy mobıldi qosymsha jasap shyǵardy, ol arqyly patsıent dárihanadaǵy dári-dármek baǵalarynyń mınıstrdiń buıryǵyna sáıkestigin teksere alady.
«Dárihanalar baǵany ózdiginen tómendetemiz dese ol óz erkinde, bastysy mınıstrlik bekitken baǵany ósirmeýi tıis. Buıryqty buzý oryn alǵan jaǵdaıda dárihana basshylyǵy ákimshilik jaýapkershilikke tartylady, ıaǵnı aıyppul tóleıdi. Eger qaıtalanǵan jaǵdaıda aldymen 6 aıǵa lıtsenzııasy alynyp, keıin tolyq dári-dármek satý quqyǵynan aıyrylatyn bolady», - dedi ol.
Farmatsııa komıtetiniń basshysy atalǵan jańa zań jobasyn Senat bekitken jaǵdaıda 2019 jyldyń 1 qańtarynan bastap kúshine enetinin aıtty.