2019 jyly Beıjińde álemdegi iri jańa áýejaı ashylady
BEIJІŃ. QazAqparat - Aspanasty eliniń astanasynda salynatyn jańa áýejaıdyń tujyrymdamalyq dızaınyn jasaý aıaqtaldy, ol álemdegi eń iri jolaýshylar áýejaıy bolmaq. Bul týraly Qytaı azamattyq avıatsııasynyń saıty (ccaonline.cn) habarlady.
Áýejaıdyń alǵashqy termınaly teńiz juldyzy túrinde salynbaq. Onyń uzyndyǵy 5 shaqyrym, aýdany 700 myń sharshymetr. Termınalda ushýǵa shyǵatyn 82 kirme esikter bolady.
Beıjińniń jańa «áýe qaqpasynyń» dızaınyn 2014 jyly qarashada tenderdi utyp alǵan frantsýzdyń «ADP Ingenierie» jáne brıtandyq «Zaha Hadid Studio» sáýlettik fırmalary jasady. Áýejaıdy salý 26 jeltoqsanda Beıjińniń Dasın aýdanynda bastaldy.
Jobanyń quny 79,98 mlrd ıýan (13,11 mlrd dollar). Áýejaı 2019 jyly paıdalanýǵa berilmek. 2020 jylǵa qaraı ol jylyna 72 mln. jolaýshyny jáne 2 mln. tonna júkterdi qabyldaı alady - bul 620 myńǵa tarta reıs degen sóz.
