2019 jyly Astananyń qoǵamdyq kólik tarıfi taǵy kóterilýi múmkin
ASTANA. QazAqparat - 2019 jyly elordanyń qoǵamdyq kólikteriniń tarıfi taǵy kóterilýi múmkin. Bul týraly búgin Astananyń Qoǵamdyq keńesinen keıin «Astana LRT» JShS-niń basqarma tóraǵasy Bekmyrza Igenberdınov aıtty, dep habarlaıdy QazAqparat tilshisi.
Bekmyrza Igenberdınovtiń aıtýynsha, qalalyq avtobýsta jolaqysyn kartamen tólem jasaýdy 120, al ekspress avtobýstarda 200 teńgege kóterý boljamdy dúnıe.
«Eń aldymen tarıfti kóterý máselesin engizdik. Bul rette másele mynada, saralanǵan tarıf engizgennen keıin júrgiziletin saraptamaǵa oraı, bul tarıftiń qanshalyq shynaıy ekendigine kóz jetkizemiz. Bekitilgen tarıfti kótermeý úshin sýbsıdııany ákimdik qanshalyqty kótere alatyndyǵyn qarastyramyz», - dedi ol.
Onyń aıtýynsha, 3-4 aıdan keıin saralanǵan tarıfti engizgennen keıin shynaıy tabystyń, shyǵynnyń qanshalyqty bolǵandyǵy Qoǵamdyq keńes tyńdaýǵa engiziletin bolady.
«Bonýstyq, aıyppul júıesi boıynsha naqty teńgerim bolýy jáne durys qyzmetti qamtamasyz etý úshin avtobýs parkterimen sáıkesinshe kelisimshart jasasamyz», - dedi basqarma tóraǵasy.
Aıta keteıik, elordada saralanǵan tarıf engizilgen kezde qoǵamdyq kólikte jol júrý quny kólik kartasymen tóleý kezinde 90 teńgeni quraıdy. Al qoǵamdyq kólikti jıi paıdalanbaıtyn nemese karta alýdy qajetsinbeıtinder úshin jol júrý quny 180 teńge bolady.
Sonymen qatar avtobýstarda kondýktor bolmaıdy.
