2019 jyly Astanada «Nurly jer» baǵdarlamasy boıynsha qansha baspana salynady
«Nurly jer» memlekettik baǵdarlamasy 2016 jyldan bastap iske qosyldy, bul maqsatta memlekettik bıýdjetten 4 mlrd 600 mln teńge qarjy qarastyrylǵan.
Búgin búkilálemdik jınaq kúninde banktiń astanalyq fılıalynyń basshylyǵy Astana turǵyndary men BAQ ókilderine «Nurly jer» baǵdarlamasy aıasynda salynyp jatqan nysandardy kórsetti. Turǵyn úıler Máńgilik el men №227 kóshelerdiń (QR PІB MO emhanasynyń janynda) jáne №27 men №36 kóshelerdiń (QR PІB avtosharýashylyǵy janynda) aýdanynda ornalasqan.
«Qazir bank 364 páterden turatyn pýl ázirlep jatyr. Taza árleýdegi páterlerdiń 1 sharshy metriniń quny 180 myń teńge. Bul Astanadaǵy ortasha naryqtyq baǵadan eki ese tómen. Páter satyp alý úshin Turǵyn úı qurylys jınaq bankiniń klıenti bolyp, depozıtke úı baǵasynyń 20% teń somany bastapqy jarnany jınaý nemese aýdarý qajet. Zaımnyń jyldyq mólsherlemesi 5% quraıdy», - dedi Turǵyn úı jınaq banki Ortalyq fılıalynyń dırektory Jansultan Mataev baspasóz týry barysynda.
Onyń aıtýynsha, baıqaýǵa qatysýshylardyń 50% bank salymshylary, qalǵan 50% ákimdikte úı kezeginde turǵan azamattar. Úılerdiń ár sharshy metriniń baǵasy Astana, Almaty qalalary boıynsha 180 myń teńge, basqa óńirler úshin 140 myń teńge. 
Búgingi esep boıynsha Turǵyn úı qurylys jınaq bankindegi jınaq shottarynyń ortasha tolyqtyrý somasy 106 myń teńgeni qurasa, al berilgen zaımdardyń ortasha somasy 10 mln teńge.
Jyl basynan beri turǵyn úı qurylys jınaq júıesiniń kómegimen 26 myń azamat baspanaly bolǵan, onyń 19 450-i úıdi kommertsııalyq naryqtan satyp alsa, 7 myńdaıy «Nurly jer» memlekettik baǵdarlamasy aıasynda zaem rásimdegen. 
«Qazir biz qazaqstandyqtar qarajat jınap úırendi dep tolyq senimmen aıta alamyz. Turǵyn úı qurylys jınaq júıesi qatysýshylarynyń ekonomıkalyq turǵydan belsendi halyq arasyndaǵy úlesi 13,1% quraıdy. 2015 jyly bul kórsetkish 7,1% edi. Bizge qarajatyn josparlap, aqshasyn sanaı alatyn, maqsatyna jete biletin azamattar keledi. Qarajat jınaý qabiletine tabystyń yqpal etpeıtinin aıta ketý kerek. Mysaly, bizdiń salymshylardyń 40% jalaqysy 150 myń teńgeden tómen. Kóp jaǵdaıda olar maqsatyna 5-6 jylda jetedi, - deıdi Jansultan Mataev. 
Fılıal basshysy buǵan qosa 2019 jyly Astanada atalǵan memlekettik baǵdarlama aıasynda taǵy 1 825 páter satý josparlanyp otyrǵanyn aıtyp ótti.
Eske salsaq,Turǵyn úı qurylys jınaq banki jelisi arqyly «Nurly jer» baǵdarlamasy aıasynda salynyp jatqan nysandar týraly aqparatty baspana.kz portalyna kirip bilýge bolady.
Osyǵan deıin Qazaqstanda 4,6 mln adamnyń ıpotekalyq baspana alýǵa múmkindigi bar ekendigin jazǵan bolatynbyz.
