2019 jyly Almatyǵa qansha sheteldik keldi
ALMATY. QazAqparat – Byltyr Almatyǵa 249 112 shetel azamaty keldi, dep habarlaıdy QazAqparat tilshisi.
Polıtsııa departamenti ókiliniń aıtýynsha, sheteldikterdiń barlyǵy memleketimizdiń kóshi-qon zańnamasyn saqtaı bermeıdi.
«Ótken jyly kóshi-qon zańnamasyn buzǵany úshin 32 myń 56 adam ákimshilik jaýapqa tartyldy, olardyń 7 myń 828-i shetel azamattary. Ákimshilik tártipke sáıkes, 2 myń 48 sheteldik elden qýyldy», - dep habarlady Almaty qalalyq PD kóshi-qon qyzmeti basqarmasynyń basshysy, polıtsııa polkovnıgi Ashat Býtýnchınov.
Sonymen qatar, sheteldik jumys kúshin eńbekke tartý erejelerin buzǵan 325 jumys berýshige ákimshilik shara qoldanyldy. Salynǵan aıyppul mólsheri 155 mıllıon 62 myń 71 teńgeni qurady.
Spıkerdiń málimeti boıynsha, byltyr qalanyń Alataý aýdanyndaǵy eńbek mıgranttaryna qyzmet kórsetetin Kóshi-qon qyzmeti ortalyǵyna 231 myń 876 sheteldik tirkelgen, eńbek mıgranttaryna jeke tulǵalarda eńbek etýge 57 myń 253 ruqsat berildi jáne uzartyldy.
