2019 jyly aqyly joldardan 5,4 mlrd teńge tústi

NUR-SULTAN. QazAqparat – 2019 jyldyń qańtar-jeltoqsanynda elimizde iske qosylǵan tórt aqyly joldan, ıaǵnı «Nur-Sultan – Shýchınsk», «Nur-Sultan – Temirtaý», «Almaty – Qorǵas» jáne «Almaty – Qapshaǵaı» avtobandarynan túsken túsim 5,4 mlrd teńgeni qurady, dep habarlaıdy QazAqparat.

QR Indýstrııa jáne ınfraqurylymdyq damý mınıstrliginiń aqparatyna sáıkes, 5,4 mıllıard teńgeniń 3,8 mıllıardy – aqyly avtomobıl joldaryn, 1,6 mıllıardy tólem alý júıesin kútip ustaý sharalaryna jumsalǵan.

«2018 jyldyń sáıkes kezeńimen salystyrǵanda, ótken jyly aqyly joldardan 3,5 esege artyq qarajat tústi. Óıtkeni, arǵy jyly Qazaqstanda «Nur-Sultan – Shýchınsk» joly ǵana aqyly bolatyn. Jyl saıyn bul joldan 1,5 mlrd teńge jınalyp keldi. Búgingi tańda eldegi aqyly joldardyń jalpy uzaqtyǵy – 682 shaqyrym», - dedi mınıstrlikten.

Atap ótilgendeı, aqyly bolǵan avtojoldardyń kútimine bıýdjetten qarajat bólý toqtatylady.

«2019 jyldyń jeltoqsanynda ınvestıtsııalyq konkýrstyń qorytyndylary boıynsha Konsortsıýmmen joldardyń 11 myń shaqyrymynda tólem alý júıesin ornatý jáne ony kútip ustaý týraly qujatqa qol qoıyldy. Kelisimge sáıkes bıyl qaıta qurylymdaýdan ótken 5,7 myń shaqyrymdyq jol ýchaskelerinde tólem alý júıesi ornatylady dep josparlanýda. Joldardyń qalǵan 5,3 myń shaqyrymy 2024 jylǵa deıin qaıta qurylymdaý sharalarynyń aıaqtalý merzimine baılanysty aqyly bolmaq. Aqyly joldar júıesin engizý arqyly sol joldardyń kútimine bıýdjetten qarajat bólinbeıtin boldy. ıAǵnı, barlyq shyǵyn jınalǵan qarajat esebinen qamtamasyz etiledi», - dep naqtylady vedomstvodan.