2019 jyly 62 myń oryndyq balabaqsha ashylady
ASTANA. QazAqparat - 2019 jyly respýblıka boıynsha 62 myń jańa balabaqsha orny ashylady. Bul týraly búgin QR Parlamenti Senatynyń depýtattarymen kezdesken Bilim jáne ǵylym mınıstri Erlan Saǵadıev aıtty, dep habarlaıdy QazAqparat tilshisi.
«Mekepke deıingi bilim sapasyn arttyrý mańyzdy mindetterdiń biri. Respýblıkada 10 314 mektepke deıingi uıym jumys isteıdi. Olarǵa 1-6 jastaǵy 880 myń bala barady. 1-3 jastaǵy balalar 4 040 memlekettik jáne 3350 memlekettik balabaqshada tárbıelenedi. Memlekettik balabaqshaǵa 130 myń, jekemenshikke 47 myń bala barady. Respýblıkada 1-3 jastaǵy balalardy balabaqshamen qamtýǵa kelsek, ata-analardyń kópshiligi balalardy úsh jasqa deıin úıde tárbıeleıdi jáne shynyn aıtsaq balabaqsha bizde áli jetispeıdi», - dedi mınıstr.
Osy rette, ol Fınlıandııada 1-3 jastaǵy balalardy qamtý 30, Ulybrıtanııada 28, AQSh-ta 29, Shveıtsarııada 26 paıyzdy quraıdy. Fınlıandııada ata-analar balalaryn úıde tárbıelese oǵan memlekettik aqy tólenetindigin aıtyp ótti. Sondyqtan kópshiligi balasyn balabaqshaǵa bermeıdi. Sol sııaqty Ulybrıtanııada, Shveıtsarııada, Frantsııada arnaıy baǵdarlama qabyldanǵan.
«Qazir 3-6 jastaǵy balalardy balabaqshamen qamtý 93 paıyzǵa jetip otyr. «Balapan» baǵdarlamasynyń aıasynda 2020 jylǵa qaraı 3-6 jastaǵy balalardy 100 paıyz qamtý mindeti qoıylǵan. Bizdiń oıymyzsha bul tapsyrma oryndalady. Qazir ol qarqyndy damyp kele jatyr. Balalardyń qamtýdy kóterý úshin kelesi jyly jergilikti atqarýshy organdar 62 myń oryn ashamyz dep otyr. Onyń ishinde 48 myńyn jeke kásipkerler ashady dep josparlanǵan. Ashylatyn oryndardyń 8 myńy 1-3 jastaǵy balalarǵa arnalǵan»,- dedi ol.
Osy rette mınıstr elimizde balabaqshaǵa kezekke turý jáne joldama berý protsesi avtomattandyrylǵanyn eske saldy.
«Biraq, ol barlyq jerde emes. Biz úlken qalalardan bastap otyrmyz. Qazirgi ýaqytta respýblıka boıynsha 29 qala men aýdan tolyǵymen avtomattandyryldy. Ata-ana balabaqshany kezekke turǵanda ózi tańdaıdy», - dedi Erlan Saǵadıev.
Sonymen qatar mınıstr balalardyń ómirin qorǵaý maqsatynda 3600 balabaqshada nemese 48 paıyzynda 40 myńnan astam kamera ornatylǵanyn aıtty. «Prezıdenttiń tapsyrmasyna sáıkes jergilikti ákimdikter beınekameramen barlyq balabaqshany qamtamasyz etýge tıis. Jol kartamyz bar, ony bárine jetkizdik», - dedi ol.
