2019 jyly 20 myńnan astam sheteldikke Qazaqstanda jumys isteýge ruqsat berildi
NUR-SULTAN. QazAqparat - 2019 jylǵy 1 qarashadaǵy jaǵdaı boıynsha Qazaqstanda sheteldik jumys kúshin tartýǵa 20 myń 557 ruqsat berilgen, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Onyń ishinde birinshi sanatqa (basshylar men olardyń orynbasarlary) 816, ekinshi sanatqa (qurylymdyq bólimshelerdiń basshylary) 4 595 ruqsat shyǵaryldy. Sheteldik jumys kúshin (ShJK) tartýǵa arnalǵan ruqsattardyń kóp bóligi úshinshi (mamandar) jáne tórtinshi (bilikti jumyskerler) sanattaryna berildi – sáıkesinshe 9 656 adam jáne 1 769 adam. Sondaı-aq maýsymdyq jumystarǵa – 2 156, korporatıvtik aýysym aıasynda 1 565 adam tartylǵan.
Qazirgi ýaqytta Qazaqstanda ShJK paıdalanatyn 2 210 jumys berýshi bar. Olarda Qazaqstannyń 518,8 myńǵa jýyq azamaty jumys isteıdi, bul qyzmetkerlerdiń jalpy sanynyń 96%-yn quraıdy.
Eńbekshi mıgranttardyń negizgi shyqqan elderi Qytaı – 4 397 adam, Ózbekstan – 2 254 adam, Úndistan – 1 819, Túrkııa – 1 845, Ulybrıtanııa – 1 420 adam.
Іshki eńbek naryǵyn qorǵaý maqsatynda Qazaqstan Respýblıkasynyń Úkimeti jyl saıyn respýblıkaǵa sheteldik mamandardy tartýǵa kvota belgileıtinin eske sala ketken jón.
2019 jylǵa sheteldik jumys kúshin tartý kvotasy respýblıkanyń ekonomıkalyq belsendi halqynyń 0,54%-y (shamamen 48,7 myń adam) deńgeıinde belgilendi.
