2019 jylǵy Qysqy Ýnıversıada alaýy Almaty kóshelerimen ótti
Dúbirli dodanyń alaýy Italııanyń Týrın qalasynan shyqqan bolatyn.
Búgin alaýdy sońǵy Ýnıversıadanyń ıesi - Almaty qalasy qabyldap aldy. 26 qyrkúıekte alaý Qytaıdyń Harbın qalasyna jetkiziledi. Máskeýde jalpy estafeta jalǵasatyn bolady. Almatydaǵy alaý estafetasy 2,5 shaqyrym qashyqtyqpen júrip ótti.
Otty shyraqty 15 alaýger Abaı kóshesimen Respýblıka saraıynyń aldynan alyp ótti. Olardyń arasynda Olımpıada chempıony Jaqsylyq Úshkempirov, boksshy Qanat Islam, QR fýtzal boıynsha quramasynyń kapıtany Dinmuhambet Súleımenov, bıatlonshy Vasılıı Podkorytovtar bar.
FISU halyqaralyq stýdenttik sport federatsııasy alaý estafetasyn bıyldan bastap jańa tártippen ótkizetin boldy. Endi alaý estafetasyna burynǵy Ýnıversıada ótkizgen eldiń ókilderi de qatysatyn boldy.
«Biz Almaty qalasynda ótken Ýnıversıadanyń baı murasyn álemge tanytýǵa tyrystyq. Bolashaqtaǵy josparlarǵa kelsek, bekitilgen jobaǵa sáıkes estafeta alaýyn ýnıversıtet kampýstarynda ótkizetin bolamyz. Bul ýnıversıtet sportyn nasıhattaýǵa septigin tıgizbek», - dedi FISU prezıdenti Oleg Matytsın.
FISU atqarý komıtetiniń múshesi, Qazaqstan Stýdenttik sport federatsııasynyń prezıdenti Qaırat Zakirııanov Almatynyń Krasnoıar ýnıversıadasynyń alaý estafetasyna qatysyp jatqanyn mańyzdy shara retinde baǵalady.
«Krasnoıar ýnıversıadasynyń halyqaralyq alaý estafetasy 3 qalada ótip jatyr. Týrın, Almaty jáne Qytaıdyq Harbın qalasy ǵana qamtylǵan. FISU qalalardy tańdaý kezinde ýnıversıtettik sportqa qosqan úlesin eskergen. Almatyda ótken Ýnıversıada - sporttyq doda tarıhyndaǵy eń úzdigi dep tanyldy», - dedi Qaırat Zákirııanov.
«Krasnoıar -2019» Ýnıversıadasynyń uıymdastyrý komıtetiniń tóraǵasy Maksım Ýrazov Almatynyń atletıkalyq aýyldy salý, eriktilermen jumys, sporttyq ınfraqurylymdy qurý boıynsha tájirıbesin alyp jatqanyn habarlady.