2019 jylǵy álemniń eń kórikti erleriniń tizimi jarııalandy
NUR-SULTAN. QazAqparat - Táýelsiz sulýlyq sarapshylary TC Candler 2019 jylǵy álemniń eń kórikti erleriniń tizimin jarııalady, dep habarlaıdy QazAqparat.
1990 jyldan beri ár jyldyń sońynda sulýlyǵymen kózge túsken tanymal tulǵalardyń tizimi jasalady. Kásibı modelderden bólek, bul tizimde akterler, sportshylar, ánshiler men blogerler de bar.
Bıylǵy kóriktiler tizimin amerıkalyq akter Krıs Evans ashady. Marvel kıno álemindegi Kapıtan Amerıkanyń rólin somdaǵan K. Evans 100-orynda tur. Sondaı-aq, bul tizimge ákeli-balaly Devıd Bekhem (20-oryn) men Brýklın Bekhem (92-oryn) qosylǵan. Áıgili fýtbolshynyń uly brıtandyq model jáne fotosýretshi bolyp jumys isteıdi. Al Arnold Shvartseneggerdiń uly - Patrık Arnold Shraıver Shvartsenegger (akter, fotomodel) birden 21-orynnan kórindi. Taǵy bir tanymal fýtbolshy Krıshtıaný Ronaldý 78-orynǵa turaqtady. Al argentınalyq fýtbolshy Lıonel Messı 2019 jylǵy sulýlyq tiziminen shyǵyp qalǵan.
Bollıvýd juldyzdary da tizimnen turaqty túrde kórinip keledi: 95-orynda Shahıd Kapýr, 48-orynda Sıdhart Malhotra. Túrkııalyq akterler arasynda Shaǵataı Ulysoı - 31-orynda, Barysh Ardých - 37 orynda jáne Djan ıAman - 76-orynǵa jaıǵasqan. Harrı Potterdi somdaǵan brıtandyq akter Denıel Redklıff 79-orynda tur. «Taqtar talasy» serıalynyń jankúıerleri brıtandyq akter Kıt Harıngtonǵa daýys berip, 72-orynǵa shyǵardy.
Ánshiler men mýzykanttar arasynda Charlı Pýt (64-oryn), Zeın Malık (60-oryn), reseılik ánshi, akter Alekseı Vorobev (23-oryn) bar.
Tizimdegi oryndardyń basym bóligi Gollıvýd juldyzdaryna berilgen. Dýeın Djonson (94-oryn) , kapıtan Kırk rólimen tanylǵan Krıs Paın (55-oryn), brıtandyq Djeımı Dornan (51-oryn), Zak Efron (49-oryn), Armı Hammer (32-oryn) jáne tizimge 7 jyl qatarynan engen akter Idrıs Elba 18-orynda tur. 17-orynda brıtandyq Genrı Kavıll, 13-orynda jas akter Tımotı Shalame, 10-orynda aýstralııalyq Krıs Hemsvort bar.
2018 jyldyń eń kórikti kelbeti atanǵan Djeıson Momoa bıyl 5-orynǵa syrǵyǵan. 2019 jyldyń úzdik úshtigin kanadalyq ánshi Shon Mendes (3-oryn), Felıks Chelberg ( Felix Kjellberg) nemese Pıýdıpaı — shved vıdeoblogeri jáne shoý-bıznes ókili (2-oryn) jáne ońtústikkoreıalyq ánshi, prodıýser, BTS tobynyń basty vokalısi Chon Djongýk (1-oryn) túıindeıdi.
Eske sala ketsek, qazaqstandyq ánshi Dımash Qudaıbergen 2018 jylǵy kórikti erler tizimine enip, 90-oryn alǵan edi. Al 2017 jyly 76-orynda bolǵan.
