2019 jyldyń 5 aıynda Qazaqstanda 16 921 birlik kólik quraly qurastyryldy
NUR-SULTAN. QazAqparat - 2019 jyldyń 5 aıynda Qazaqstanda 16 921 birlik kólik quraly qurastyryldy. Bul týraly búgin Úkimet úıindegi baspasóz máslıhatynda QR Indýstrııa jáne ınfraqurylymdyq damý vıtse-mınıstri Amanııaz Erjanov aıtty, dep habarlaıdy QazAqparat tilshisi.
«Avtomobıl jasaý Qazaqstannyń mashına jasaý salasynyń jańa baǵyty bolyp sanalady. Ulttyq avtomobıl qurastyrýdy damytý ekonomıkanyń basqa salalaryna mýltıplıkatıvti áser etedi. Jańa jumys oryndaryn qurýǵa múmkindik beredi. Qazirgi sátte bul sektordaǵy jumys oryndarynyń sany shamamen 2 myń adamǵa, al ónerkásiptiń aralas salalaryndaǵy jumys oryndarynyń sany 7 myń adamǵa jetedi», - dedi Amanııaz Erjanov.
Onyń dereginshe, búgingi kúni respýblıka aýmaǵynda «SaryarqaAvtoProm» JShS, «Azııa Avto» AQ, «KAMAZ-Injınırıng» AQ, «Hyundai Trans Auto» JShS sııaqty jeńil jáne júk avtomobılderiniń iri óndirýshileri jumys isteıdi. JAC, Ravon, IVECO, GM, Skoda, Peugeot, Kia, Hyundai, Daewoo, Renault, Nissan, AVTOVAZ sııaqty álemdik kóshbasshylarmen yntymaqtastyq salasynda jumystar júrgizilýde.
«Nátıjesinde, Qazaqstanda avtokólik quraldarynyń barlyq túrlerin jınaý boıynsha óndiris quryldy. 2018 jyldyń qorytyndysy boıynsha mashına jasaý salasyndaǵy avtomobıl jasaý úlesi 19,2 paıyzdy qurady. Al 2019 jyldyń qańtar-mamyr aılarynda mashına jasaý salasyndaǵy avtomobıl jasaý úlesi 25,4 paıyzǵa deıin ósti. 2018 jyldyń qorytyndysy boıynsha óndiris kólemi 205 mlrd teńgeni jáne 32 298 kólik quralyn qurady. Mashına jasaý salasynyń naqty kólem ındeksiniń kólemi 2018 jyly 114 paıyz boldy. Osy jyldyń 5 aıynyń qorytyndysy boıynsha 114 mlrd teńge somasyna 16 921 birlik kólik quraldary óndirildi. Jeńil avtomobılder óndirisi 41,5 paıyzǵa, avtobýstar 3,2 esege, júk avtomobılderi 35 paıyzǵa jáne tirkemeler men jartylaı tirkemeler 35 paıyzǵa ósti», - dedi ol.
