2019 jyldan bastap mektep túlekterine memleket tarapynan kepildendirilgen tegin tehnıkalyq bilim beriledi
ASTANA. QazAqparat - 2019 jyldan bastap mektep túlekterine memleket tarapynan kepildendirilgen tegin tehnıkalyq bilim beriledi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Bilim jáne ǵylym vıtse-mınıstri Tahır Balyqbaev aıtty.
«Búgin Úkimet otyrysynda «Qazaqstan Respýblıkasynyń keıbir zańnamalyq aktilerine bilim berý máseleleri boıynsha ózgerister men tolyqtyrýlar engizý týraly» zań jobasy talqylandy. Zań jobasy Elbasynyń «Qazaqstan 2050» strategııasy: Qalyptasqan memlekettiń jańa saıası baǵyty» atty halyqqa arnalǵan Joldaýynda jarııalanǵan birqatar tapsyrmalardy oryndaý maqsatynda daıyndalǵan. Zań jobasyndaǵy negizgi ózgerister bilim salasyndaǵy memlekettik kepildikterdi kóterýge, joǵary oqý oryndarynyń akademııalyq erkindigine, mamandar daıarlaýdyń praktıkalyq bóligin kúsheıtýge jáne basqa máselelerge arnalady», - dedi ol
Vıtse-mınıstrdiń sózine qaraǵanda, bul zań jobasy úsh zańnamaǵa ózgeris engizýdi qarastyrady. Atap aıtqanda, Eńbek kodeksine, Bilim týraly zańǵa jáne Qazaqstan Respýblıkasynyń arnaıy memlekettik organdar týraly zańyna 119 ózgeris engiziletin bolady.
«Eń negizgi ózgeristerdi atap óter bolsam, eń aldymen tehnıkalyq jáne kásibı bilimdi alǵashqy ret tegin jumysshy mamandyǵyna qamtamasyz etý kepildigi beriletin bolady. Osyndaı usynys engizilýde. Bul jerde aıta keterlik jaıt, búgingi tańda bizdiń mektepter 11 synypty bitirgen túlekterdiń 25 myńnan 30 myńǵa deıingi bala joǵary oqý oryndarymen de, kolledjdermen de qamtylmaǵan. Sol sebepti olar eńbek naryǵyna mamandyqsyz shyǵady. Sondyqtan olardyń eńbek etý múmkindigi tómen», - dedi vıtse-mınıstr.
Onyń sózine qaraǵanda, osyǵan oraı Elbasy mektep túlekterine memleket tarapynan kepildendirilgen tehnıkalyq bilim berý tapsyrmasyn júktegen bolatyn.
«Osy máseleni qazir biz zańǵa engizip jatyrmyz. Ol birtindep engiziletin bolady. Kelesi jyldan bastap bıýdjetten qarjy da bólinbek. 2019 jyldan bastap tolyǵymen engiziletin bolady», - dedi T.Balyqbaev.
